गर्भ संस्कार: आयुर्वेदिक र योगिक दृष्टिकोण

---

गर्भ संस्कार भन्नाले गर्भावस्थालाई वैज्ञानिक ढङ्गले योजना बनाई स्वस्थ शिशु प्राप्त गर्ने र आमाको स्वास्थ्य सुनिश्चित गर्ने विशेष प्रक्रिया हो। गर्भ संस्कारको मूल उद्देश्य गर्भावस्थामा आमा स्वस्थ र खुसी रहून् र अन्त्यमा स्वस्थ शिशुको जन्म होस् भन्ने हो।

यस प्रक्रियामा आयुर्वेद, योग, ज्योतिष, सङ्गीत (सङ्गीत उपचार) विद्याहरू समावेश गरिन्छन्। आयुर्वेद अनुसार, गर्भ संस्कार स्वस्थ सन्तान जन्माउनका लागि उत्कृष्ट उपाय मानिन्छ। यसले गर्भवती महिलाले गर्भावस्थाभरि शारीरिक तथा मानसिक रूपमा सुदृढ रहनुपर्ने कुरामा जोड दिन्छ।

गर्भावस्था महिलाको जीवनमा ठूलो शारीरिक, रोगविज्ञानजन्य तथा मानसिक अनुकूलनको समय हो। यस अवधिमा शरीरका हरेक अङ्ग र कोशिकाले उच्च गतिमा काम गर्न थाल्छन्। स्वस्थ सन्तानको विकास यी सबै अनुकूलनहरूमा निर्भर हुन्छ। त्यसैले गर्भवती महिलाले सम्पूर्ण गर्भावस्थाभरि विशेषहेरचाह पाउनुपर्छ।

आचार्य चरकले यसलाई “श्रेयसी प्रजा” अर्थात् स्वस्थ र श्रेष्ठ सन्तान प्राप्तिको अवधारणा भनेर वर्णन गरेका छन्।

यसरी, गर्भ संस्कारले गर्भधारणको तयारीदेखि लिएर शिशु जन्मदासम्मको सम्पूर्ण मातृ-हेरचाहको पूर्ण प्रोटोकल प्रदान गर्दछ। यसले माताको स्वास्थ्य सुनिश्चित मात्र गर्दैन, आमा र शिशुबीचको आत्मीय सम्बन्ध पनि गाढा बनाउँछ। गर्भ संस्कारलाई पेटभित्रै भ्रूणलाई शिक्षा दिने प्रक्रिया पनि भनिन्छ, जस अन्तर्गत बाह्य माध्यमबाट शिशुको इन्द्रियलाई सौम्य रूपमा उद्दीपन गरेर उसको शारीरिक, भावनात्मक र बौद्धिक क्षमताको अधिकतम विकास गर्न सकिन्छ।

गर्भ संस्कार सम्बन्धी ज्ञान प्राचीन शास्त्रहरूदेखि पाइन्छ र यो आयुर्वेद, योग तथा धर्मशास्त्रहरूसँग गहिरो सम्बन्ध राख्छ।

“गर्भ संस्कार” शब्दको शाब्दिक अर्थ “पूर्व शिक्षा” वा “भ्रूणको परिष्कार” भन्ने हुन्छ, जसले गर्भाधानभन्दा अघि आमाबाबुको सचेत तयारी, समग्र प्रसूति-पूर्व हेरचाह तथा गर्भावस्थाभरि भ्रूणको आध्यात्मिक, मानसिक र सांस्कृतिक पोषणमा जोड दिन्छ। आयुर्वेद र योग मिलेर केवल स्वस्थ शिशु जन्म मात्र नभई बलियो, सद्गुणी, संस्कारी र भावनात्मक रूपमा सन्तुलित सन्तान जन्म सुनिश्चित गर्ने पूर्ण प्रणाली प्रस्तुत गर्दछन्।

आयुर्वेदिक दृष्टिकोण
आयुर्वेदले मातृ तथा शिशु स्वास्थ्यका लागि व्यापक प्रोटोकल सुझाउँछ:

शारीरिक तथा मानसिक तयारी: गर्भाधानभन्दा अघि दम्पतीको शरीर र मनलाई शुद्ध (शोधन) र सुदृढ बनाउने (बीज शुद्धि)।

प्रसूति-पूर्व हेरचाह (गर्भिणी परिचर्या): गर्भावस्थाको प्रत्येक महिनामा खानपान, जीवनशैली र पालन गर्ने दिनचर्याबारे निर्देशन।

सहायक औषधोपचार: आवश्यक परेमा गर्भलाई समर्थन गर्न वा जटिलता उपचार गर्न औषधीय तयारी वा घृत सेवन।

प्रसवको समयमा हेरचाह: प्राकृतिक प्रसूति अभ्यास, पीडानिवारण विधि तथा सुरक्षित प्रसव।

प्रसूति-पश्चात् हेरचाह (सुतिका परिचर्या): विशेष आहार, आराम र उपचार जसले आमाको शक्ति पुनःस्थापना गर्ने र वात दोष सन्तुलन गर्ने।

नवजात शिशु हेरचाह (जाट परिचर्या): संस्कारहरू, तेल मालिस, स्तनपान र सङ्क्रमणविरुद्ध सुरक्षा।

बाल चिकित्सा: पोषण, रोगप्रतिरोधक क्षमता बढाउने तयारी र बाल विकास रणनीतिहरू।

आचार्य चरकले यसलाई “श्रेयसी प्रजा” अर्थात् स्वस्थ, सद्गुणी र सात्त्विक सन्तान प्राप्तिको उद्देश्यका रूपमा वर्णन गरेका छन्।

योगिक दृष्टिकोण
योगले मन- शरीर अनुशासनमार्फत गर्भ संस्कारलाई परिपूरक बनाउँछ:

गर्भाधानभन्दा अघि: नाडी शुद्धि (ऊर्जा नली शुद्ध गर्ने) का लागि प्राणायाम।

गर्भावस्थामा:

प्रत्येक महिना अनुसार तयार गरिएका आसनहरू जसले रक्तसञ्चारमा मद्दत गर्ने र भ्रूणको उचित विकास गर्ने।

प्राणायाम अभ्यास जसले मन शान्त पार्ने, सास नियमन गर्ने र आमाको तनाव घटाउने।

प्रसव तयारी: गहिरो सास फेर्ने र ध्यानात्मक अभ्यास जसले प्रसवलाई सहज बनाउने।

यी अभ्यासहरूले शरीरलाई बलियो बनाउँछन्, चिन्ता घटाउँछन् र सकारात्मक तरङ्गहरू उत्पन्न गर्छन्, जसलाई भ्रूणले प्रत्यक्ष अनुभव गर्छ।

आवश्यकता
गर्भ संस्कार हरेक गर्भवती आमाका लागि अत्यन्त महत्त्वपूर्ण शास्त्र हो, जसले गर्भमै स्वस्थ शरीर, मन र आत्माको सचेत विकासमा जोड दिन्छ। यसको महत्त्व आजको युगमा बहुआयामिक छ:

१) भविष्यको पुस्तालाई प्रतिस्पर्धात्मक बनाउन तयारी: आजको वैश्वीकरण, प्रविधिको तीव्र विकास र उग्र प्रतिस्पर्धाको युगमा भविष्यका सन्तानहरू बुद्धिमान, सृजनशील, अनुकूलनशील र स्रोतसाधनयुक्त हुन जरुरी छ।

२) अस्वस्थ सन्तानमार्फत सामाजिक अधोगति रोकथाम: अस्वस्थ, कमजोर वा भ्रमित सन्तानले परिवार र समाजमा दीर्घकालीन क्षति पुर्‍याउँछ। यस्तो परिणामले सांस्कृतिक, नैतिक र नीतिगत मूल्यहरू क्षीण गर्न सक्छ। सद्गुणविहीन पुस्ताले मानवताको आधारभूत संरचनालाई नै धम्की दिन्छ, जसले सामाजिक असन्तुलन, द्वन्द्व र पतन निम्त्याउँछ।

३) बाल्यकालमै मूल्य र सद्गुणहरूको खेती: आधुनिक विज्ञानले स्वीकार गरेको छ कि भ्रूणको मस्तिष्क विकास, इन्द्रिय उद्दीपन र मानसिक छाप गर्भमै सुरु हुन्छ। आयुर्वेदले गर्भ संस्कारमार्फत गर्भाधानदेखि नै बुद्धि, बल, चरित्र (शील) र सद्गुणको पोषण गर्न अभ्यासहरू निर्दिष्ट गरेको छ।

४) आमा र शिशुको समग्र स्वास्थ्य: गर्भावस्था महिलाको जीवनमा ठूलो शारीरिक र मानसिक अनुकूलनको अवधि हो। उचित प्रसूति-पूर्व मार्गदर्शनले आमालाई शारीरिक स्वास्थ्य, मानसिक सन्तुलन र आध्यात्मिक शान्ति प्रदान गर्छ, जसको प्रत्यक्ष असर भ्रूणमा पर्छ।

गर्भाधान-पूर्व स्याहार 
गर्भाधान-पूर्व स्याहार एक सचेत तथा अग्रसर चरण हो, जसले गर्भधारणलाई केवल संयोगबाट सचेत छनोटतर्फ उन्मुख गराउँछ। यस अवधारणाले स्वास्थ्य सेवाको केन्द्रविन्दु गर्भावस्थाको प्रारम्भिक चरणबाट गर्भाधान हुनुअघिका अत्यन्त महत्त्वपूर्ण महिनाहरूतर्फ सार्दछ। गर्भाधान-पूर्व स्याहारमा गर्भधारण हुनुअघि नै दम्पतीलाई शारीरिक, मानसिक तथा नैतिक रूपमा तयार पार्ने प्रक्रिया समावेश हुन्छ।

यसमा दुवै दम्पतीका लागि आहार (आहार-विहार), विहार (जीवनशैली), तथा सदवृत्त (नैतिक आचरण) जस्ता आधारभूत तत्त्वहरू महत्त्वपूर्ण मानिन्छन्। साथै, पञ्चकर्म उपचार तथा रसायन र वाजीकरण चिकित्साको प्रयोग जस्ता विशेष आयुर्वेदिक उपायहरू पनि यस अन्तर्गत पर्दछन्। गर्भाधान हुनुअघि नै शरीरलाई तयार पार्दा बीज शुद्धि प्राप्त गर्न सहयोग पुग्दछ र स्वस्थ सन्तान प्राप्तिको सम्भावना बढ्दछ।

गर्भाधानअघि र पछि दम्पतीको पोषण अवस्था तथा मानसिक स्वास्थ्यले गर्भको विकासमा महत्त्वपूर्ण भूमिका खेल्दछ। गर्भाधानपूर्व आमाबुबामध्ये कुनै एकमा रहेको तनावले पनि जनन कोषहरूमा प्रभाव पार्न सक्छ र यसको असर एक वा एकभन्दा बढी पुस्तासम्म देखिन सक्ने ‘ट्रान्स-जेनेरेसनल’ प्रभाव उत्पन्न हुन सक्छ।

यदि गर्भाधान हुन्छ भने, आमाले आयुर्वेदमा वर्णन गरिएझैँ मासानुमासिक गर्भिणी परिचर्या (महिना–महिना अनुसारको गर्भावस्थाको हेरचाह) पालना गर्नुपर्छ। यी उपायहरूले सकारात्मक गर्भाशय वातावरण निर्माण गर्छन्, जसले आमा र शिशु दुवैको स्वास्थ्य सुनिश्चित गर्छ।

प्रमुख अभ्यासहरू
१. गर्भसंवाद (भ्रूणसँग संवाद): गर्भस्थ शिशुसँग नियमित र स्नेहपूर्ण संवाद गर्नु आवश्यक छ। आमा–बुबालाई प्रेमपूर्वक बोल्न, सकारात्मक विचार प्रकट गर्न र शिशुप्रति आशीर्वाद तथा शुभेच्छा व्यक्त गर्न प्रोत्साहित गरिन्छ।

२. गर्भगीत (सङ्गीत र साहित्य): शान्त र मधुर सङ्गीत सुन्ने, भजन–कीर्तन गर्ने र प्रेरणादायी साहित्य—विशेष गरी महान् व्यक्तित्वहरूको जीवनकथा वा धार्मिक ग्रन्थ—पढ्न सिफारिस गरिएको छ। आधुनिक अध्ययनहरूले पनि गर्भावस्थामा सङ्गीत उपचारले भ्रूणको मस्तिष्क विकास र आमाको मानसिक शान्तिमा सहयोग पुर्‍याउने देखाएका छन्।

३. गर्भमन्त्र (मन्त्र जप): भक्तिभावसहित मन्त्र जप गर्दा आमाको शरीर र मनमा शान्ति प्राप्त हुन्छ र भ्रूणमा सकारात्मक कम्पनात्मक ऊर्जा सञ्चारित हुन्छ।

४. गर्भप्रार्थना र ज्योति–ध्यान (प्रार्थना र दिव्य प्रकाशमा ध्यान): दैनिक प्रार्थना र ध्यानले आध्यात्मिक शक्ति र आत्मसमर्पणको भावना विकास गर्छ। दिव्य प्रकाशमा ध्यान गर्दा आमा शान्त, आशावादी र मानसिक रूपमा सन्तुलित रहन्छिन्।

५. योगासन, प्राणायाम र ध्यान: गर्भावस्थाका लागि उपयुक्त कोमल योगासन, नियन्त्रित श्वास–प्रश्वास (प्राणायाम) र ध्यान अभ्यास गर्दा शरीर सबल हुन्छ, रक्तसञ्चार सुध्रिन्छ, भ्रूणलाई अक्सिजन आपूर्ति बढ्छ र ढाड दुखाइ वा सुन्निने समस्या कम हुन्छ।

महत्त्व
यी सबै गर्भ संस्कार अभ्यासहरू गर्भावस्थाको समग्र हेरचाहका लागि एक ‘होलेस्टिक’ दृष्टिकोण हुन्। आमाको शरीर, मन र आत्मालाई सन्तुलित गरेर, यी अभ्यासहरूले भ्रूणको स्वस्थ विकासमा प्रत्यक्ष योगदान पुर्‍याउँछन् र भविष्यमा एक सबल, गुणी र सन्तुलित व्यक्तित्व निर्माण गर्न आधार तयार गर्छन्।

गर्भ संस्कार सेवा लिन सकिने स्थानहरू:
त्रि.वि. आयुर्वेद क्याम्पस कीर्तिपुर, आयुर्वेद तथा वैकल्पिक चिकित्सालय काठमाडौं, पतञ्जली मेडिकल कलेज तथा रिसर्च सेन्टर धुलिखेल, ॐ धन्वन्तरी अस्पताल धुम्बाराही, काठमाडौँ।

(डा. खुश्बु झा आयुर्वेद क्याम्पस, कीर्तिपुरकी स्त्री तथा प्रसूति रोग विशेषज्ञ हुन्।)