२३ आश्विन २०८३, शुक्रबार ०७:२२
तुलसीपुर – स्वास्थ्य तथा खाद्य स्वच्छतामन्त्री निशा मेहताले दाङको लमहीमा निर्माणाधीन ट्रमा सेन्टरको निरीक्षण गरेकी छन् ।
बिहीबार मन्त्रालयका अधिकारीसहितको टोलीले ट्रमा सेन्टरको निरीक्षण गरेको हो । निरीक्षणका क्रममा मन्त्री मेहताले ट्रमा सेन्टर सञ्चालनका सम्बन्धमा छिट्टै निर्णय गरिने बताइन् ।
प्रादेशिकस्तरको उक्त ट्रमा सेन्टरको भौतिक संरचना चालु आर्थिक वर्षभित्रै निर्माण सम्पन्न गर्ने तयारी छ । करिब २२ करोड रुपैयाँ लागतमा निर्माण भइरहेको सेन्टरको भौतिक प्रगति हालसम्म ७४ प्रतिशत पुगेको छ ।
निर्माण सम्पन्न भएपछि ट्रमा सेन्टरबाट उपचार सेवा सञ्चालन गर्न संघीय सरकारले तत्काल आवश्यक निर्णय गर्नुपर्ने भन्दै लुम्बिनी प्रदेश सरकारले ध्यानाकर्षण गराएको थियो । प्रदेशका स्वास्थ्यमन्त्री दीपेन्द्र पुनसहित मन्त्रालयका सम्बन्धित अधिकारीले यस विषयमा संघीय सरकारको ध्यानाकर्षण गराएका हुन् ।
स्वास्थ्य तथा खाद्य स्वच्छता मन्त्रालयका सचिव डा. विकास देवकोटाले लुम्बिनी प्रदेशको राजधानी क्षेत्रका अस्पताललाई विशिष्टीकृत स्वास्थ्य सेवा प्रदान गर्ने संस्थाका रूपमा विकास गर्न पहल भइरहेको बताए ।
यसैबीच, मन्त्री मेहताले बिहीबार नै लमही अस्पतालको समेत निरीक्षण गरेकी छन् ।
प्रतिकृया दिनुहोस्