कालिका–१ को शानदार जितसँगै वडा स्तरीय फुटबल प्रतियोगिता सुरु

---

कालिका, चितवन — युवाहरूमा खेलकुदप्रतिको रुचि अभिवृद्धि गर्दै स्थानीयस्तरमा रहेका खेल प्रतिभाको पहिचान तथा प्रवर्द्धन गर्ने उद्देश्यले आयोजित वडा स्तरीय फुटबल प्रतियोगिता–२०८३ सुरु भएको छ।

कालिका नगरपालिकाका नगर प्रमुख विनोद रेग्मीले प्रतियोगिताको उद्घाटन गर्नुभएको हो। उद्घाटन समारोहमा बोल्दै नगर प्रमुख रेग्मीले खेलकुदले युवाहरूको शारीरिक तथा मानसिक विकाससँगै अनुशासन, नेतृत्व क्षमता र सकारात्मक सोचको विकासमा महत्वपूर्ण भूमिका खेल्ने बताउनुभयो।

उहाँले स्थानीयस्तरमा खेलकुदको विकास र खेलाडीको प्रतिभा पहिचानका लागि नगरपालिकाले निरन्तर सहयोग र सहकार्य गर्ने प्रतिबद्धता व्यक्त गर्नुभयो।

कार्यक्रमका सभाध्यक्ष तथा कालिका नगरपालिका–१ का वडाध्यक्ष सन्तवीर स्याङदानले वडा तहमा खेलकुदको विकास तथा स्थानीय खेलाडीको प्रतिभा पहिचान गर्ने उद्देश्यले प्रतियोगिता आयोजना गरिएको बताउनुभयो। खेलकुदले युवाहरूलाई अनुशासित, स्वस्थ र सकारात्मक बाटोमा अघि बढाउन महत्वपूर्ण योगदान पुर्‍याउने उल्लेख गर्दै उहाँले खेलाडीलाई आवश्यक सहयोग र प्रोत्साहन प्रदान गरिने बताउनुभयो।

त्यस्तै, कालिका नगरपालिका–४ का वडाध्यक्ष मकरमान श्रेष्ठले खेलकुदले युवाहरूमा अनुशासन, एकता, सहकार्य र सकारात्मक सोचको विकास गर्नुका साथै स्थानीय प्रतिभाको पहिचान र विकासमा महत्वपूर्ण भूमिका खेल्ने बताउनुभयो।

उहाँले प्रतियोगितामा सहभागी सम्पूर्ण खेलाडी तथा टोलीलाई शुभकामना दिँदै खेललाई जित–हारमा मात्र सीमित नगरी स्वस्थ प्रतिस्पर्धा, अनुशासन र खेलभावनाका साथ अघि बढाउन आग्रह गर्नुभयो। साथै, वडाबाट खेलकुद क्षेत्रको विकास तथा स्थानीय खेलाडीको प्रोत्साहनका लागि आगामी दिनमा आवश्यक सहयोग र सहकार्यलाई निरन्तरता दिने प्रतिबद्धता व्यक्त गर्नुभयो।

पहिलो खेलमै कालिका–१ को फराकिलो जित

प्रतियोगिताको पहिलो दिन कालिका–१ र कालिका–४ बीच प्रतिस्पर्धा भएको थियो। उक्त खेलमा कालिका–१ ले कालिका–४ लाई ६–० गोल अन्तरले पराजित गर्दै शानदार सुरुवात गरेको छ।

खेलमा उत्कृष्ट प्रदर्शन गरेका कालिका–१ का खेलाडी आर.एन. दोङ ‘म्यान अफ द म्याच’ घोषित हुनुभएको छ।

प्रतियोगिताको दोस्रो दिन कालिका–३ र कालिका–७ बीच प्रतिस्पर्धा हुने आयोजकले जनाएको छ।

उद्घाटन समारोहमा विशिष्ट अतिथिका रूपमा कालिका नगरपालिकाकी उपप्रमुख बिमला तामाङ तथा अतिथिका रूपमा कालिका नगर प्रवक्ता लक्ष्मण पौडेल, वडा नं. ४ का अध्यक्ष मकरमान श्रेष्ठ, वडा नं. ५ का अध्यक्ष दिपकबहादुर भट्टराई, कालिका कार्यपालिका सदस्य सरस्वती खत्री, वडा नं. १ का सदस्य ओमकार खड्का, वडा सदस्य जीवन लामा लगायतको उपस्थिति रहेको थियो।

त्यस्तै, चतुर्मुखी सामुदायिक वनका अध्यक्ष हरिकुमार गुरुङ, माथिल्लो भेग गडुवा खानेपानी संस्थाका अध्यक्ष लालबहादुर ख्युल, तल्लो भेग गडुवा खानेपानी संस्थाका अध्यक्ष ज्ञानेन्द्र श्रेष्ठ, पदमपुर प्रहरी बिटका इन्चार्ज रामप्रकाश राय यादव, सृजनशील टोल विकास संस्थाका अध्यक्ष रघुनाथ सापकोटा, जुटपानी गरिबी निवारण साना किसान कृषि सहकारी संस्था लिमिटेडका अध्यक्ष खोमबहादुर गुरुङ कालिका बचत तथा ऋण सहकारी संस्था लिमिटेडका अध्यक्ष सन्तोष बोम्जन लगायतको सहभागिता रहेको थियो।

यसैबीच, राम श्रेष्ठ (इन्डियन) ले प्रतियोगिताको सात दिनसम्म दैनिक ‘म्यान अफ द म्याच’ घोषित हुने खेलाडीलाई नगद रु. ५५० का दरले पुरस्कार प्रदान गर्ने घोषणा गर्नुभएको छ। सोअनुसार सात दिनका लागि कुल रु. ३ हजार ८५० पुरस्कार सहयोग उपलब्ध गराइने भएको छ भने कार्यक्रम सञ्चालन लालीगुराँस टोल विकास संस्थाका अध्यक्ष कृष्णप्रसाद घिमिरेले गर्नुभएको थियो।