नेकपा बागमती प्रदेश कमिटी सदस्य बद्रीनाथ घिमिरे रास्वपामा प्रवेश 

---

रत्ननगर, असोज १४ । 

नेपाल कम्युनिस्ट पार्टी (नेकपा) बागमती प्रदेश कमिटी सदस्य एवम् रत्ननगरका प्रभावशाली नेता बद्रीनाथ घिमिरे राष्ट्रिय स्वतन्त्र पार्टी (रास्वपा) मा प्रवेश गरेका छन्। बुधबार रत्ननगरको घण्टीघरमा आयोजित एक कार्यक्रमका बीच रास्वपाका सह-महामन्त्री एवम् चितवन क्षेत्र नम्बर १ का प्रतिनिधि सभा सदस्य हरि ढकाल लगायतका नेताहरूले घिमिरेलाई पार्टीमा स्वागत गरेका हुन्।

 

स्थानीय राजनीतिमा बलियो पकड र जनाधार बनाएका घिमिरे २०७९ को स्थानीय तह निर्वाचनमा रत्ननगर नगरपालिकाको उप-प्रमुख पदका उम्मेदवार थिए। तात्कालिक समयमा नेपाल कम्युनिष्ट पार्टी (एकीकृत समाजवादी) का तर्फबाट सत्ता गठबन्धन (नेपाली कांग्रेससहित) का साझा उम्मेदवारका रूपमा चुनावी मैदानमा उत्रिएका उनले १२ हजार ३५४ मत प्राप्त गरेका थिए।

 

सो निर्वाचनमा नेकपा एमालेका उम्मेदवार यादवप्रसाद पाठक  सँग थोरै मतान्तरले पराजित भए पनि घिमिरेले रत्ननगरमा बलियो जनसमर्थन हासिल गरेका थिए। घिमिरेसँगै रत्ननगरमा विभिन्न राजनीतिक दलहरूमा सक्रिय रहेका ६० भन्दा बढी नेता तथा कार्यकर्ताहरू समेत रास्वपामा प्रवेश गरेका छन्।