यामाल चम्किँदा स्पेनको ४–१ को जित

---

काठमाडाैँ – युइएफए नेसन्स लिगअन्तर्गत समूह ‘सी’ को खेलमा स्पेनले क्रोएसियामाथि ४–१ को सहज जित निकालेको छ।

सेभियास्थित रामोन सान्चेज पिजहुआन रंगशालामा भएको खेलमा स्पेनलाई जिताउन लामिन यामालले दुई गोल गरे भने मार्क पुबिल र निको विलियम्सले एक–एक गोल थपे। क्रोएसियाका लागि डियन ड्रेना बेलजोले फर्काएको एक गोल सान्त्वनामै सीमित बन्यो।

खेलको दोस्रो मिनेटमै यामालले गोल गर्दै स्पेनलाई सुरुआती अग्रता दिलाएका थिए। तर २८औं मिनेटमा क्रोएसियाका बेलजोले गोल गर्दै खेल १–१ को बराबरीमा ल्याए। त्यसको तीन मिनेटपछि अर्थात् ३१औं मिनेटमा पुबिलले यामालको पासमा गोल गर्दै स्पेनलाई पुनः २–१ को अग्रता दिलाए ।

दोस्रो हाफमा पनि दबाब बनाएको स्पेनका लागि ६३औं मिनेटमा यामालले व्यक्तिगत दोस्रो गोल गर्दै टोलीको अग्रता ३–१ बनाए। निर्धारित समय सकिन एक मिनेट बाँकी छँदा निको विलियम्सले चौथो गोल गर्दै स्पेनलाई फराकिलो जित दिलाएका हुन् ।

जितसँगै ६ अंक जोडेको स्पेन समूहको शीर्ष स्थानमा छ । पराजित क्रोएसिया तेस्रो स्थानमा छ। स्पेनको यो लगातार ४०औं खेलको अपराजित यात्रा हो।