महिलाको आर्थिक सशक्तीकरणका लागि रत्ननगरको झुवानीमा मौरीपालन तालिम सुरु 

---

 

 

रत्ननगर । महिलालाई सीप र आयआर्जनसँग जोड्दै आत्मनिर्भर बनाउने उद्देश्यले रत्ननगर–५, झुवानीमा पाँचदिने मौरीपालन तालिम सुरु भएको छ। तालिममा १६ जना महिला सहभागी छन्।

 

झुवानी सामुदायिक पुस्तकालयको आयोजना तथा Six Degree Network for Women, रत्ननगर–५ वडा कार्यालय र मौरीपालन विकास केन्द्र, भण्डाराको प्राविधिक सहयोगमा तालिम सञ्चालन गरिएको हो।

 

कार्यक्रमका प्रमुख अतिथि रत्ननगर नगरपालिका वडा नं. ५ का वडाध्यक्ष बालकृष्ण चापागाईंले किसानले अनुदानको पछि लाग्नुभन्दा व्यवसायलाई प्राथमिकता दिनुपर्ने बताए। राज्यले किसानका लागि विभिन्न अनुदानका कार्यक्रम ल्याए पनि कतिपय किसानले त्यसबारे जानकारी लिन नसक्दा अवसरबाट वञ्चित हुने गरेको उनको भनाइ थियो।

‘व्यवसाय राम्रो गर्नुस्, अनुदान आफैँ पछि लागेर आउँछ,’ चापागाईंले भने। उनले महिलालाई आर्थिक रूपमा आत्मनिर्भर बनाउन मौरीपालनजस्ता व्यवसायिक सीप प्रभावकारी हुने बताए।

वडाध्यक्ष चापागाईले मह तथा मौरीजन्य उत्पादनको महत्वबारे अझै पर्याप्त जनचेतना आवश्यक रहेको उल्लेख गर्दै उनले स्वदेशी महको उत्पादन तथा उपभोग बढाउनुपर्नेमा जोड दिए। विदेशी, विशेषगरी भारतीय महको आयातले स्वदेशी मौरीपालकलाई असर पार्न सक्ने भएकाले त्यसतर्फ राज्यले ध्यान दिनुपर्ने उनले बताए।

 

कार्यक्रममा मौरीपालन विकास केन्द्र, भण्डाराका प्रमुख  सुजन अंगाईले चितवनमा देशको कुल मह उत्पादनको करिब २० प्रतिशत उत्पादन हुने जानकारी दिए। चितवनमा मौरीपालनको राम्रो सम्भावना भए पनि महिलाहरू व्यवसायिक रूपमा यस क्षेत्रमा पर्याप्त रूपमा जोडिन नसकेको उनले बताए।

 

महिलालाई मौरीपालनतर्फ आकर्षित गर्दै व्यवसायिक बनाउन पाँचदिने तालिम आयोजना गरिएको अंगाईले बताए। तालिममार्फत सहभागीलाई मौरीपालनको प्रविधि, व्यवस्थापन, उत्पादन तथा व्यवसायिक सम्भावनाबारे व्यावहारिक ज्ञान प्रदान गरिनेछ।

 

झुवानी सामुदायिक पुस्तकालयका अध्यक्ष अनिल अर्यालले महिलालाई सीप र आयआर्जनसँग जोड्दै आत्मनिर्भर बनाउने उद्देश्यले तालिम आयोजना गरिएको बताए। समुदाय विकासमा महिलाको आर्थिक सशक्तीकरण महत्वपूर्ण हुने भएकाले मौरीपालनलाई आयआर्जनको माध्यमका रूपमा अघि बढाउन खोजिएको अर्यालले बताए ।