स्वास्थ्य सेवा मूल्याङ्कनमा चितवनका सात स्थानीय तहमध्ये माडी पहिलो

---

चितवन–चितवनका सात स्थानीय तहका स्वास्थ्य शाखामध्ये माडी नगरपालिकाको स्वास्थ्य शाखा स्वास्थ्य सेवा मूल्याङ्कनमा पहिलो भएको छ ।जनस्वास्थ्य कार्यालयले भरतपुरमा आयोजना गरेको आर्थिक वर्ष २०८२र८३ को वार्षिक समीक्षा गोष्ठीमा प्रस्तुत गरिएको स्वास्थ्य सेवाका सूचक तथा प्रस्तुतीकरण मूल्याङ्कनमा माडी पहिलो भएको हो ।

माडीले ८६ दशमलव १० अङ्क प्राप्त गरी पहिलो, भरतपुर महानगरपालिकाले ८५ दशमलव ४३ अङ्कसहित दोस्रो र खैरहनी नगरपालिकाले ८२ अङ्कसहित तेस्रो स्थान हासिल गरेको जनस्वास्थ्य कार्यालयका प्रमुख निर्मल घिमिरेले जानकारी दिनुभयो ।

उहाँका अनुसार गत आर्थिक वर्षमा स्थानीय तहले सम्पादन गरेका स्वास्थ्य सेवासम्बन्धी सूचक तथा समीक्षा गोष्ठीमा प्रस्तुत गरिएको विवरणका आधारमा मूल्याङ्कन गरिएको हो ।

प्रमुख घिमिरेले भन्नुभयो, “कार्यसम्पादनका आधारमा जिल्लाका सातवटै स्थानीय तहका स्वास्थ्य शाखा उत्कृष्ट छन् । केही सूचकमा भएको अङ्कको फरकका आधारमा मात्र स्थान निर्धारण भएको हो ।”

समीक्षा गोष्ठीका अवसरमा प्रथम, द्वितीय र तृतीय हुने स्वास्थ्य शाखालाई बागमती प्रदेशका स्वास्थ्य तथा सामाजिक विकासमन्त्री गिरबहादुर तामाङले पुरस्कार तथा प्रमाणपत्र वितरण गर्नुभयो ।

कार्यक्रममा जिल्ला समन्वय समितिका प्रमुख नारायणप्रसाद अधिकारी, बागमती प्रदेश स्वास्थ्य निर्देशनालयका निर्देशक डा नरेन्द्रकुमार झा, तालिम केन्द्रका प्रमुख दीपक तिवारी, मन्त्रालयका जनस्वास्थ्य प्रशासक दुर्गादत्त चापागाईंलगायतको सहभागिता थियो ।