विदेशको अवसर छाडेर सीपलाई व्यवसायमा रूपान्तरण गर्दै दीपेश, सौराहा चोकमा प्रशिक्षणसहितको सलुन सञ्चालन

---

 

चितवन, रत्ननगर — ५ असोज।

वैदेशिक रोजगारीका लागि विदेश जाने युवाको संख्या बढिरहेका बेला रत्ननगर–११ का दीपेश लोप्चनले आफूले सिकेको सीपलाई स्वदेशमै व्यवसायमा रूपान्तरण गरेका छन्। उनले रत्ननगर–१, सौरा चोकस्थित गङ्गा प्लाजा सुपर मार्केटमा ‘बार्बर हब ट्रेनिङ सेन्टर एन्ड सैलुन’ सञ्चालनमा ल्याएका हुन्।

स्थानीयस्तरमै रोजगारी तथा स्वरोजगारको अवसर सिर्जना गर्ने उद्देश्यले सैलुनसँगै प्रशिक्षण केन्द्रसमेत सञ्चालनमा ल्याएको लोप्चनले बताए।

“विदेश जानुभन्दा आफूले सिकेको सीपलाई यहीँ व्यवसायका रूपमा अघि बढाउने सोच बनाएँ,” उनले भने।

सैलुनमा सेवा प्रदान गर्नुका साथै सीप सिक्न चाहने युवालाई तालिम दिएर स्वरोजगार बन्न सहयोग गर्ने उनको उद्देश्य छ। प्रशिक्षण केन्द्रमा विभिन्न हेयर स्टाइल, विशेष अवसरका लागि हेयर स्टाइलिङ तथा आधुनिक हेयर स्टाइलसम्बन्धी तालिम सञ्चालन गरिने उनले जानकारी दिए। कपालसम्बन्धी बेसिक तथा दुईमहिने एड्भान्स कोर्स समेत सञ्चालन गरिने उनको भनाइ छ।

सैलुनमा नयाँ–नयाँ हेयर स्टाइल, हेयर कलर, फेसियल तथा डेडलक लगायतका सेवा सुपथ मूल्यमा उपलब्ध हुने बताइएको छ। ग्राहकको सहजताका लागि एसी, वाइफाइ तथा फराकिलो बस्ने ठाउँको व्यवस्था गरिएको सञ्चालक लोप्चनले बताए।

छोराले विदेश जाने अवसर त्यागेर स्वदेशमै व्यवसाय सुरु गरेपछि उनका अभिभावकसमेत खुसी छन्। उनका बुबाले काम ठूलो–सानो नहुने भन्दै आफ्नो सीप र श्रमलाई स्वदेशमै उपयोग गर्नुपर्ने बताए।

“काम ठूलो–सानो हुँदैन। आफ्नो सीप र श्रमलाई जहाँ पनि उपयोग गर्न सक्नुपर्छ। छोराले विदेश जाने अवसर छाडेर आफ्नै ठाउँमा व्यवसाय सुरु गरेकोमा खुसी लागेको छ,” उनले भने।

वैदेशिक रोजगारीतर्फ युवाको बढ्दो आकर्षणका बीच आफ्नै सीप, श्रम र लगानीबाट स्वदेशमै व्यवसाय सुरु गरेका लोप्चनको प्रयासले स्थानीय युवालाई स्वरोजगारतर्फ प्रेरित गर्ने अपेक्षा गरिएको छ।