५ आश्विन २०८३, सोमबार ०६:५२
काठमाडौँ – स्पेनिस ला लिगाअन्तर्गत ‘मड्रिड डर्बी’ मा एट्लेटिको मड्रिडसँग २–१ ले पराजित भएपछि रियल मड्रिडका मुख्य प्रशिक्षक जोसे मौरिन्होले रेफ्रीको निर्णयप्रति तीव्र असन्तुष्टि जनाएका छन्। खेलपछिको पत्रकार सम्मेलनमा उनी ए–फोर साइजको कागज बोकेर उपस्थित भएका थिए, जसमा एट्लेटिकोका खेलाडीले पाउनुपर्ने रातो कार्डका दुई वटा दृश्यका स्क्रिनसट थिए।
पत्रकार सम्मेलनमा तस्बिर देखाउँदै मौरिन्होले भने, “हामी पत्रकार सम्मेलन नगर्दा पनि हुन्छ, किनकि खेलको असली कहानी यहाँ छ। पहिलो हाफमा एट्लेटिकोका खेलाडीलाई दुई वटा प्रस्ट रातो कार्ड दिनुपर्थ्यो। १० खेलाडीमा सीमित भएर खेल्नुपरेको अवस्थामा यदि ५० मिनेट ११ विरुद्ध ९ को खेल भएको भए के हुन्थ्यो होला ?”
मौरिन्होले ३७ औँ मिनेटमा एट्लेटिकोका क्रिस्टियन रोमेरोले जुड बेलिङ्घममाथि गरेको ट्याकल र ली काङ-इनले फेडे भल्भर्देमाथि गरेको फलमा सोझै रातो कार्ड हुनुपर्ने दाबी गरे। रेफ्रीको नियुक्तिमाथि पनि प्रश्न उठाउँदै उनले भने, “म यी सब गल्ती नै हुन् भन्ने विश्वास गर्न चाहन्छु, जसरी प्रशिक्षक वा खेलाडीबाट गल्ती हुन्छ।”
अर्कोतर्फ, जितबाट उत्साहित एट्लेटिकोका प्रशिक्षक डिएगो सिमेओनेले मौरिन्होको भनाइप्रति संयमित प्रतिक्रिया दिए। “हामी सबै प्रशिक्षकले आफ्नो अभिव्यक्तिमा सावधानी अपनाउनुपर्छ,” सिमेओनेले भने, “हामीले रेफ्री र सहकर्मीको सम्मान गर्नुपर्छ। जब कसैले त्यो सम्मानको सिमाना नाघ्छ, त्यो सही होइन।”
सिमेओनेले टोलीको रक्षात्मक रणनीति र सामूहिक प्रयासकै कारण टोलीले खेलमा नियन्त्रण बनाएको दाबी गरे। यो पराजयसँगै रियल मड्रिड लिग तालिकाको चौथो स्थानमा झरेको छ भने एट्लेटिको दोस्रो स्थानमा उक्लिएको छ।
प्रतिकृया दिनुहोस्