यी १० अविस्मरणीय क्षण : जसले बनायो लियोनल मेस्सीलाई महान् फुटबलर

---

काठमाडाैँ– दुई दशकभन्दा बढी समय अर्जेन्टिनाको जर्सी लगाएर खेलेका लियोनल मेस्सीले अन्तर्राष्ट्रिय फुटबलबाट बिदा लिएका छन् । उनलेे यो लामो यात्रामा अविस्मरणीय सम्झनाहरूको विशाल विरासत छाडेका छन्।

अर्जेन्टिनासँग मेस्सीको यात्रा कुनै बेला करिअरकै सबैभन्दा तल्लो बिन्दुमा पुगेको थियो । तर उनलेे अन्ततः विश्व फुटबलकै सबैभन्दा उचाइमा पुगेर विश्राम लिएका छन् ।

दुई दशकभन्दा बढी समय ‘अल्बिसेलेस्टे’को जर्सी लगाएका मेस्सीले सोमबारदेखि अन्ततः अन्तर्राष्ट्रिय फुटबलबाट औपचारिक रूपमा संन्यास लिएका छन्। यससँगै अर्जेन्टिनाको राष्ट्रिय टोलीसँग जोडिएको उनको ऐतिहासिक अध्याय समाप्त भएको छ।

मेस्सीले भावुक पत्रमार्फत आफ्नो संन्यासको घोषणा गरे। ‘यो निर्णयले मेरो आत्मालाई दुखायो र अझै दुखाइरहेको छ। तर अब समय आइसकेको छ भन्ने मैले बुझेको छु,’ महान नम्बर १० ले लेखेका थिए।

अगस्टको अन्त्यमा अन्तर्राष्ट्रिय फुटबलबाट संन्यास घोषणा गरेका मेस्सीले अर्जेन्टिना स्पेनसँग २०२६ को विश्वकप फाइनलमा पराजित भएको दुई दिनपछि नै उक्त पत्र लेखेको बताएका छन्।

विश्व फुटबलकै महानतम खेलाडीमध्ये एक मानिने मेस्सीले अन्तर्राष्ट्रिय मञ्च छाड्ने घोषणा गरेपछि विश्व फुटबलमा तरंग फैलिएको छ।

‘समय धेरै बाँकी छैन। अध्यायहरू समाप्त हुँदैछन् र यो अध्याय समाप्त हुनु धेरै पीडादायी छ,’ मेस्सीले भनेका छन्।

मेस्सीको अर्जेन्टिनासँगको यात्रा २१औँ शताब्दीको अधिकांश समयसम्म फैलिएको छ। यस क्रममा उनले फुटबल इतिहासमै अमर रहने कैयौँ क्षण सिर्जना गरे।

अर्जेन्टिनाका लागि लियोनल मेस्सीका १० अविस्मरणीय क्षण :

अर्जेन्टिनासँगको भविष्य सुनिश्चित गरेको पहिलो खेल

सन् २००४ जुन २९ मा मेस्सीले पहिलोपटक अर्जेन्टिनाको जर्सी लगाए। उनले पराग्वेविरुद्धको मैत्रीपूर्ण खेलमा अर्जेन्टिनाको प्रतिनिधित्व गरेका थिए। अर्जेन्टिनी फुटबल संघले मेस्सीकै लागि विशेष रूपमा उक्त खेल आयोजना गरेको थियो।

त्यतिबेला १७ वर्षीय मेस्सीले बार्सिलोनाको सिनियर टोलीबाट डेब्यु पनि गरेका थिएनन्। तर अन्तर्राष्ट्रिय स्तरमा स्पेनको प्रतिनिधित्व गर्न उनलाई आकर्षित गर्ने प्रयास भइरहेको थियो।

तर अर्जेन्टिनी फुटबल संघले छिट्टै कदम चाल्यो। उसले मेस्सीलाई अर्जेन्टिनाका लागि खेलाउन र स्पेनले आफ्नो टोलीमा लैजान नदिन उक्त मैत्रीपूर्ण खेल आयोजना गर्यो।

मेस्सीले गोल गरेपछि अर्जेन्टिनाको यू–२० टोलीले पराग्वेको यू–२० टोलीलाई ६–० ले पराजित गर्यो। त्यसपछि सुरू भयो एउटा ऐतिहासिक यात्रा।

अझ रोचक कुरा, मेस्सीको अर्जेन्टिनाका लागि डेब्यु अर्जेन्टिनोस जुनियर्सको मैदानमा भएको थियो। यही क्लबको मैदानमा यसअघि डिएगो म्याराडोनाले पनि आफ्नो डेब्यु गरेका थिए ।अहिले त्यो रंगशालाले म्याराडोनाकै नाम बोकेको छ।

अर्जेन्टिनी भूमिमा अन्तिम आधिकारिक खेल

अर्जेन्टिनाले २०२६ विश्वकपका लागि सहज रूपमा स्थान सुरक्षित गरिसकेको थियो। तर दक्षिण अमेरिकी छनोटको अन्तिम खेलमा ब्युनस आयर्सको विशाल एस्टाडियो मोनुमेन्टलमा भेनेजुएलाविरुद्धको खेल मेस्सीका लागि विशेष थियो।

सेप्टेम्बर ५, २०२५ मा भेनेजुएलाविरुद्ध खेल सुरु हुनुअघि वार्मअप गर्दै गर्दा मेस्सीले आँसु थामेका थिए। उनलाई थाहा थियो, यो आफ्नै भूमिमा अर्जेन्टिनाका लागि खेल्ने उनको अन्तिम प्रतिस्पर्धात्मक खेल हुनेछ।

तर आफ्नो विदाइको खेलमा मेस्सीले उत्कृष्ट प्रदर्शन गरे। उनले दुई गोल गरेपछि अर्जेन्टिनाले भेनेजुएलालाई ३–० ले पराजित गर्यो।

‘यहाँ यसरी अन्त्य गर्न पाउनु सधैँ मेरो सपना थियो,’ खेलपछि मेस्सीले भनेका थिए। अर्जेन्टिनी समर्थकका लागि आफ्नै भूमिमा मेस्सीको यो अन्तिम विदाइ प्रदर्शन अविस्मरणीय बन्यो।

इङ्ग्ल्यान्डविरुद्ध फेरि पुरानै जादु

ब्राजिलबाहेक अर्जेन्टिनाको सबैभन्दा ठूलो अन्तर्राष्ट्रिय प्रतिद्वन्द्वी इङ्ग्ल्यान्डविरुद्ध टोली हारको संघारमा थियो। २०२६ विश्वकपको सेमिफाइनलमा ३९ वर्षीय मेस्सीले फेरि एकपटक असाधारण प्रदर्शन गरे।

खेलको अन्तिम समयमा मेस्सीका दुई असिस्टमा अर्जेन्टिनाले इंग्ल्यान्डलाई २–१ ले पराजित गर्दै लगातार दोस्रो विश्वकप फाइनलमा स्थान बनायो।

विश्व फुटबलका ठूला स्टारहरू रहेको खेलमा पनि सबैभन्दा चम्किलो खेलाडी मेस्सी नै थिए। उनले नौ पटक सफल ड्रिब्लिङ गरेका थिए, जुन २०२६ विश्वकपको एउटै खेलमा कुनै खेलाडीले गरेको सबैभन्दा धेरै थियो।

म्याराडोनाले १९८६ को विश्वकप क्वार्टरफाइनलमा इंग्ल्यान्डविरुद्ध गरेको प्रदर्शनपछि विश्वकपमा इङ्ग्ल्यान्डविरुद्ध यस्तो उपलब्धि हासिल गर्ने उनी पहिलो खेलाडी बने।

अर्जेन्टिनालाई सबैभन्दा बढी आवश्यकता परेको समयमा मेस्सीले फेरि एकपटक समयलाई पछि फर्काएजस्तो प्रदर्शन गरे।

एक्लै अर्जेन्टिनालाई २०१८ विश्वकपमा पुर्‍याएको क्षण

जर्ज साम्पाओलीको प्रशिक्षणकालमा अर्जेन्टिनाको टोली निकै कमजोर अवस्थामा थियो। २०१८ विश्वकप छनोटको अन्तिम खेलमा इक्वेडरलाई उसकै मैदानमा हराउनैपर्ने अवस्थामा अर्जेन्टिना मैदानमा उत्रिएको थियो।

झन् कठिन कुरा, घरेलु टोलीले सुरुमै अग्रता लियो।

त्यसपछि मेस्सी देखा परे।

अर्जेन्टिनाका लागि उनको उत्कृष्ट व्यक्तिगत प्रदर्शनमध्ये एक मानिने उक्त खेलमा मेस्सीले ह्याट्रिक गर्दै अर्जेन्टिनालाई २०१८ विश्वकपमा पुर्‍याए।

अर्जेन्टिनी कमेन्टेटरले मेस्सीको ह्याट्रिकपछि भावुक हुँदै भनेका थिए, ‘म तिमीलाई माया गर्छु, प्रतिभाशाली। धन्यवाद, प्रतिभाशाली।’

करिअरको तल्लो बिन्दु

२०१६ को कोपा अमेरिकाको फाइनल मेस्सीका लागि राम्रो क्षण थिएन। बरु यो उनको अन्तर्राष्ट्रिय करिअरको सबैभन्दा पीडादायी क्षणमध्ये एक थियो।

फाइनलमा अर्जेन्टिना लगातार दोस्रो वर्ष चिलीसँग पेनाल्टी सुटआउटमा पराजित भयो। मेस्सीले आफ्नो पेनाल्टी पनि आकाशतर्फ हानेका थिए।

यो लगातार तेस्रो वर्ष थियो, जब मेस्सीले अर्जेन्टिनासँग ठूलो फाइनल गुमाए। यसअघि जर्मनीसँग विश्वकप फाइनल हारेका थिए भने दुईपटक चिलीसँग कोपा अमेरिकाको फाइनलमा पराजित भए।

त्यतिबेलासम्म मेस्सीले सिनियर अन्तर्राष्ट्रिय फुटबलमा कुनै उपाधि जितेका थिएनन्। अर्को पीडादायी हारपछि मेस्सीले तत्कालै राष्ट्रिय टोलीबाट संन्यासको घोषणा गरे।

पछि उनी आफ्नो निर्णयबाट फर्किए र अर्जेन्टिनाका लागि खेल्न थाले। तर यो क्षणले उनको अन्तर्राष्ट्रिय करिअरको कठिन संघर्षलाई प्रतिनिधित्व गरेको थियो।

विश्वविजेताको हैसियतमा घर फर्किँदा

२०२२ को विश्वकप जितेपछि अर्जेन्टिनाले पहिलोपटक घरेलु मैदानमा पानामाविरुद्ध खेल्दा ब्युनस आयर्सको मोनुमेन्टल रंगशालामा देखिएको दृश्य रोमाञ्चक थियो।

एक लाखभन्दा बढी अर्जेन्टिनी समर्थकले विश्वविजेता टोलीको स्वागत गरे र त्यसको केन्द्रमा मेस्सी थिए।

मेस्सीको अनुहारले नै धेरै कुरा बताइरहेको थियो। लगभग २० वर्षको प्रयासपछि उनले आफ्नो जीवनको सबैभन्दा ठूलो लक्ष्य पूरा गरेका थिए।

दुई फ्रिकिक पोस्टमा लागेपछि मेस्सीले तेस्रो प्रयासमा उत्कृष्ट फ्रिकिक गोल गरे। उक्त गोल उनको करिअरको ८००औँ गोल पनि थियो।

वर्षौंसम्म अन्तर्राष्ट्रिय उपाधि नजितेको भन्दै अर्जेन्टिनी समर्थकबाट आलोचना खेपेका मेस्सी त्यस दिन साँच्चै राष्ट्रका नायक बनेका थिए।

यात्राको अन्त्य

२०२६ विश्वकप फाइनलमा स्पेनसँग अर्जेन्टिनाको हार आफैँमा ऐतिहासिक थियो। तर अहिले त्यो खेलको महत्व अझ बढेको छ, किनभने त्यो मेस्सीको अन्तर्राष्ट्रिय करिअरको अन्तिम खेल बनेको छ।

मेस्सी र प्रशिक्षक लियोनल स्कालोनीको अर्जेन्टिनाले दोस्रो विश्वकप जित्न सकेन। खेलमा प्रभावशाली प्रदर्शन गरेको स्पेनले तत्कालीन विश्वविजेता अर्जेन्टिनालाई पराजित गर्यो।

मेस्सी खेलको अधिकांश समय नियन्त्रणमा राखिएका थिए र टोलीलाई हारबाट जोगाउन सकेनन्। दोस्रोपटक विश्वकप फाइनल हारेपछि उनको आँखाबाट आँसु बगे।

तर सन् २०१४ को हारभन्दा यो हार फरक थियो। २०२६ सम्म आइपुग्दा मेस्सीले प्रमाणित गर्नुपर्ने केही बाँकी थिएन। उनले २०२२ मै अर्जेन्टिनालाई विश्वकप जिताइसकेका थिए।

अर्जेन्टिनासँग मेस्सीको अन्तिम नृत्य सुखद अन्त्यमा पुग्न सकेन। तर ३९ वर्षको उमेरमा सबैथोक जितिसकेका मेस्सी घाँटीमा रजत पदक लगाएर मैदानमै रोइरहेको दृश्य पनि उत्तिकै भावुक र सुन्दर थियो।

लगातार दोस्रो दक्षिण अमेरिकी उपाधि

२०२४ को कोपा अमेरिकामा मेस्सीले व्यक्तिगत रूपमा आफ्नो उत्कृष्ट प्रदर्शन गर्न सकेनन्। उनले छ खेलमा एक गोल र एक असिस्ट मात्रै गरे र प्रतियोगिताभर चोटसँग संघर्ष गरे।

तर अर्जेन्टिनालाई लगातार दोस्रोपटक कोपा अमेरिका जिताउने टोलीको उनी अझै पनि मुटु र आत्मा थिए।

फाइनलमा घुँडाको चोटका कारण मेस्सी मैदानबाट बाहिरिए। बेन्चमा पुगेपछि उनी आँसु रोक्न सकेनन्।

अन्ततः अर्जेन्टिनाले उपाधि जित्यो। चार वर्षको अवधिमा अर्जेन्टिनाले जितेको यो तेस्रो ठूलो उपाधि थियो।

यससँगै मेस्सीको नेतृत्वमा अर्जेन्टिनाले आफ्नो इतिहासकै सबैभन्दा सफल युग पूरा गर्यो।

पहिलो उपाधि

लामो प्रतीक्षापछि मेस्सीले सन् २०२१ को कोपा अमेरिकामार्फत अर्जेन्टिनासँग पहिलो ठूलो अन्तर्राष्ट्रिय उपाधि जिते।

यससँगै अर्जेन्टिनाको २८ वर्ष लामो उपाधिविहीन यात्रा समाप्त भयो। मेस्सी प्रतियोगिताभर शानदार रहे। उनले चार गोल र पाँच असिस्ट गर्दै अर्जेन्टिनालाई उपाधिसम्म पुर्‍याए।

फाइनलमा अर्जेन्टिनाले ब्राजिललाई उसकै प्रतिष्ठित माराकाना रंगशालामा १–० ले पराजित गर्यो। मेस्सीले अन्ततः आफ्नो पहिलो सिनियर अन्तर्राष्ट्रिय उपाधि उठाए।

फाइनलको अन्तिम सिटी बज्नासाथ मेस्सी मैदानमा ढलेका थिए। उनका सबै सहकर्मी उनलाई बधाई दिन दौडिएका थिए।

यही क्षण मेस्सीको अन्तर्राष्ट्रिय करिअरको निर्णायक मोड बन्यो।

अन्ततः विश्वकपको शिखरमा

डिसेम्बर १८, २०२२ मा मेस्सी फुटबल इतिहासमा अमर बने।

पाँचौँ प्रयासमा उनले अन्ततः अर्जेन्टिनालाई तेस्रो विश्वकप उपाधि दिलाए। कतार विश्वकप उनको करिअरको सबैभन्दा उत्कृष्ट अन्तर्राष्ट्रिय प्रतियोगिता बन्यो।

मेक्सिकोविरुद्ध अर्जेन्टिनाको अभियानलाई नयाँ दिशा दिएको गोलदेखि नेदरल्यान्ड्सविरुद्ध नाहुएल मोलिनालाई दिएको शानदार असिस्टसम्म, क्रोएसियाविरुद्ध सेमिफाइनलमा जोस्को ग्भार्डियोललाई परास्त गर्दै गरेको उत्कृष्ट प्रदर्शनदेखि दबाबमा हानेका पेनाल्टीसम्म, कतारमा मेस्सीको जादु सबै ठाउँमा देखियो।

त्यसपछि आयो फ्रान्सविरुद्धको ऐतिहासिक फाइनल। मेस्सीले फाइनलमा दुई गोल गरे। तर किलियन एम्बाप्पेले ह्याट्रिक गर्दै खेललाई पेनाल्टी सुटआउटसम्म पुर्‍याए।

अन्ततः पेनाल्टी सुटआउटमा अर्जेन्टिना सफल भयो। गोन्जालो मोन्टिएलले निर्णायक पेनाल्टी गोल गरेपछि मेस्सीको विश्वकप सपना पूरा भयो।

आफ्नो सम्पूर्ण अन्तर्राष्ट्रिय करिअरमा म्याराडोनासँग तुलना गरिएका मेस्सीले अन्ततः अर्जेन्टिनालाई १९८६ मा म्याराडोनाले जिताएपछि पहिलोपटक विश्वकप उपाधि दिलाए।

मेस्सी प्रतियोगिताको सर्वोत्कृष्ट खेलाडी घोषित भए। लुसैल रंगशालाको पोडियममा उभिएर सुनौलो विश्वकप ट्रफी चुम्बन गर्दा एउटा कुरा स्पष्ट भएको थियो। मेस्सीले अन्ततः आफ्नो सफलताको अधिकतम् उचाइसहित बिदा भए।