८ भाद्र २०८३, सोमबार ०६:३०
म्युनिख – बार्यन म्युनिखका स्टार स्ट्राइकर ह्यारी केन जर्मनीको ‘प्लेयर अफ द इयर’ पुरस्कार जित्ने पहिलो अंग्रेजी फुटबलर बनेका छन्। गत सिजन टोलीलाई लिग र कपको दोहोरो उपाधि दिलाउनुका साथै च्याम्पियनसिप लिगको सेमिफाइनलसम्म पुर्याउन सबै प्रतियोगितामा गरी ६१ गोल गरेका केनलाई यस वर्षको सर्वोत्कृष्ट खेलाडी घोषित गरिएको हो।
‘किकर’ म्यागजिनद्वारा आयोजित तथा जर्मन खेलकुद पत्रकार संघका ६९५ जना सदस्यले गरेको मतदानका आधारमा यो पुरस्कार प्रदान गरिन्छ। पुरस्कारका लागि बुन्डेसलिगामा खेल्ने खेलाडी वा विदेशमा खेल्ने जर्मन खेलाडी योग्य मानिन्छन्। मतदानमा केनले २७२ मत प्राप्त गरे भने उनका बार्यन सहकर्मी माइकल ओलिसे २०३ मतसहित दोस्रो स्थानमा रहे।
बार्यनका खेलकुद निर्देशक म्याक्स एबर्लले केनको प्रशंसा गर्दै भने, “ह्यारी केनको वर्णन गर्न सही शब्द भेट्टाउन असम्भव जस्तै छ। उनी पहिले नै इंग्ल्यान्डको ‘फुटबलर अफ द इयर’ चुनिसकेका थिए, र अब जर्मनीमा पनि यो उपाधि जितेका छन्।”
इङ्ल्यान्डका कप्तान समेत रहेका केन आगामी अक्टोबरमा लन्डनमा प्रदान गरिने सन् २०२६ को ‘बालोन डि ओर’ को मुख्य दावेदारमध्ये एक हुन्। यदि उनले यो पुरस्कार जितेमा, जर्मन क्लबको प्रतिनिधित्व गर्दै बालोन डि ओर जित्ने दोस्रो अंग्रेजी खेलाडी बन्नेछन्। यसअघि केभिन केगनले सन् १९७८ र १९७९ मा ह्यामबर्गमा छँदा यो सफलता हासिल गरेका थिए।
यसैबीच, बार्यनका मुख्य प्रशिक्षक भिन्सेन्ट कम्पानी ‘कोच अफ द इयर’ घोषित भएका छन् भने बार्यन महिला टोलीकी कप्तान जुलिया ग्विन उत्कृष्ट महिला खेलाडी चुनिइन्। केन र कम्पानीलाई शुक्रबार एलियान्ज एरेनामा भिएफबी स्टटगार्टविरुद्ध हुने बार्यनको बुन्डेसलिगा उद्घाटन खेलअघि सम्मानित गरिनेछ।
प्रतिकृया दिनुहोस्