२८ श्रावण २०८३, बिहीबार ०६:४८
लण्डन – इङ्लिस क्लब चेल्सीले आफ्ना अर्जेन्टिनी मिडफिल्डर इन्जो फर्नान्डेजलाई खरिद गर्न चाहने टोलीहरूका लागि १२ करोड पाउन्डभन्दा बढीको प्रस्ताव पठाउन शुक्रबारसम्मको समय तोकेको छ।
२५ वर्षीय फर्नान्डेजले गत मार्चमै स्पेनिस क्लब रियल म्याड्रिड जाने सम्भावनाबारे कुरा उठाएयता स्टामफोर्ड ब्रिजमा उनको भविष्य अन्यौलमा रहँदै आएको थियो। सोही समयमा उनका एजेन्ट ह्याभियर पास्टोरेले फर्नान्डेजले सोचेजति पारिश्रमिक नपाएको र क्लबको खराब प्रदर्शनपछि उनी टोली छाड्न चाहेको सार्वजनिक अभिव्यक्ति दिएका थिए। गत सिजन प्रिमियर लिगमा १०औँ स्थानमा सीमित भएको चेल्सी एफए कपको फाइनलमा म्यानचेस्टर सिटीसँग पराजित हुँदै उपाधिविहीन बनेको थियो।
रियल म्याड्रिडले भने फर्नान्डेजलाई अनुबन्ध गर्ने कुनै योजना नरहेको प्रस्ट पारिसकेको छ। यस्तो अवस्थामा म्यानचेस्टर सिटी मात्र उनको सम्भावित नयाँ गन्तव्यका रूपमा देखिएको छ, जहाँ गत सिजन चेल्सी छाडेका एन्जो मारेस्का मुख्य प्रशिक्षक छन्। तर, सिटीले चेल्सीले तोकेको टोली मूल्य चुकाउन तयार छ या छैन भन्ने स्पष्ट छैन।
चेल्सीले बेलायती समय अनुसार शुक्रबार साँझ ५ बजेसम्मको समयसीमा तोक्दै १२ करोड पाउन्डको मूल्यमा कुनै सम्झौता नगर्ने अडान राखेको छ। सन् २०२३ मा बेन्फिकाबाट १० करोड ७० लाख पाउन्डमा भित्र्याइएका फर्नान्डेजलाई बिक्री गर्न चेल्सीले करिब ६० दिनको पर्याप्त समय दिएको थियो। नयाँ सिजन सुरु हुनुअघि यो विषयलाई टुंगोमा पुर्याउने चेल्सीको रणनीति छ।
चेल्सीका नयाँ मुख्य प्रशिक्षक जाबी अलोन्सोले फर्नान्डेजसँग उनको भविष्यबारे कुराकानी गरे पनि संवादका विवरण भने सार्वजनिक गर्न अस्वीकार गरेका छन्। सम्झौता नभएमा फर्नान्डेजलाई पुन: टोलीको मुख्य खेलाडीकै रूपमा राखिने चेल्सी स्रोतले जनाएको छ।
गत सिजन चेल्सीका लागि ५४ खेलमा १५ गोल र ७ एसिस्ट गरेका फर्नान्डेजले अर्जेन्टिनालाई विश्वकपको फाइनलसम्म पुर्याएका थिए। तर, स्पेनविरुद्ध १-० ले पराजित भएको उक्त फाइनलमा उनी रातो कार्ड खाँदै मैदानबाट बाहिरिएका थिए। फर्नान्डेज यसै साता प्रशिक्षक अलोन्सोको मातहतमा पहिलोपटक चेल्सीको प्रशिक्षणमा फर्किएका छन्।
प्रतिकृया दिनुहोस्