२१ श्रावण २०८३, बिहीबार ०७:२९
काठमाडौँ – विश्वकप फुटबलमा उत्कृष्ट प्रदर्शन गर्दै सामाजिक सञ्जालमा छाएका केप भर्डेका गोलकिपर बोजिन्हा चिलीको प्रतिष्ठित क्लब ‘कोलो-कोलो’मा आबद्ध भएका छन्।
पोर्चुगलको दोस्रो डिभिजनको क्लब ‘चाभेस’ छाडेर ३४ पटकको चिली च्याम्पियन कोलो-कोलो पुगेका ४० वर्षीय गोलकिपरले आफू सधैँ ठूलो क्लबमा खेल्न योग्य रहेको महसुस गर्ने बताएका छन्।
“साना लिग र धेरै नाम नरहेका क्लबमा खेले पनि मेरो मनभित्र म सधैँ आफूलाई ‘ठूलो क्लब’को खेलाडी मान्थेँ,” बोजिन्हाले सञ्चारकर्मीसँग भने, “त्यसैले जब कोलो-कोलोबाट प्रस्ताव आयो, मलाई कुनै दुविधा भएन। अरू धेरै ठाउँबाट प्रस्ताव आए पनि मेरो पहिलो रोजाइ यही क्लब थियो।”
आफ्नो पहिलो विश्वकप सहभागितामै अफ्रिकी टापु राष्ट्र केप भर्डेलाई नकआउट चरणसम्म पुर्याउन बोजिन्हाले महत्त्वपूर्ण भूमिका खेलेका थिए। समूह ‘एच’ मा रहेको केप भर्डेले विश्वविजेता स्पेन, उरुग्वे र साउदी अरेबियालाई बराबरीमा रोक्दै दोस्रो चरणको यात्रा तय गरेको थियो। अन्तिम ३२ को खेलमा टोली अर्जेन्टिनासँग पराजित भएको थियो।
यसअघि एङ्गोला, साइप्रस, मोल्डोभा र स्लोभाकियाका क्लबबाट खेलिसकेका बोजिन्हाले भने, “विश्वकप मेरो फुटबल जीवनकै उत्कृष्ट क्षण थियो, तर त्यो अब इतिहास भइसकेको छ। अहिले कोलो-कोलो जस्तो ऐतिहासिक र विशाल क्लबको प्रतिनिधित्व गर्न पाउनु मेरो क्लब करियरकै सबैभन्दा ठूलो उपलब्धि हो।”
प्रतिकृया दिनुहोस्