२५ जनाको ज्यान लिने ‘ध्रुवे’ हात्ती अब जिपिएस निगरानीमा, दाह्रा काटेर निकुञ्जमै छाडियो

---

 

चितवन -चितवन राष्ट्रिय निकुञ्ज र आसपासको मध्यवर्ती क्षेत्रमा लामो समयदेखि आतंक मच्चाइरहेको जंगली हात्ती ‘ध्रुवे’लाई नियन्त्रणमा लिएर ‘रेडियो कलर’ जडान गरिएको छ।

 

निकुञ्ज र आसपासका क्षेत्रमा गरि हालसम्म २५ जनाको ज्यान लिइसकेको उक्त हिंस्रक हात्तीलाई प्राविधिक टोलीले डार्ट (बेहोस बनाउने औषधि) गरेर नियन्त्रणमा लिएको हो।

 

निकुञ्जका सूचना अधिकारी अविनाश थापा मगरका अनुसार हात्तीलाई सफलतापूर्वक बेहोस बनाएपछि उसको घाँटीमा अत्याधुनिक स्याटेलाइट रेडियो कलर जडान गरिएको छ। सुरक्षा संवेदनशीलतालाई ध्यानमा राख्दै प्राविधिक टोलीले हात्तीको दाह्रा समेत काटेर पुनः प्राकृतिक बासस्थानमै छाडिदिएको छ।

 

घाँटीमा रेडियो कलर जडान गरिएसँगै अब हात्तीको अवस्थाबारे छोटो समयमै विस्तृत जानकारी प्राप्त हुने र जिपिएस ट्र्याकिङ प्रणालीमार्फत उसको हरेक गतिविधिलाई २४सै घण्टा निगरानी गर्न सकिने निकुञ्ज प्रशासनले जनाएको छ। यसले गर्दा हात्ती मानव बस्तीतर्फ प्रवेश गर्न लागेमा पूर्वसूचना पाउन सजिलो हुनेछ।

 

निकुञ्जको सुरक्षार्थ तैनाथ नेपाली सेनाको नयाँ गोरख गण, निकुञ्जका प्राविधिक कर्मचारीहरू र राष्ट्रिय प्रकृति संरक्षण कोषका वन्यजन्तु विज्ञ एवं प्राविधिकसहितको संयुक्त टोलीले निकै जोखिम मोलेर यो अपरेसन सफल पारेको हो।

 

गत असार २० गते भरतपुर महानगरपालिका-२३ मा सोही हात्तीको हिंस्रक आक्रमणबाट २५ वर्षीया आशिका बोटे र उनका चार वर्षीय छोरा भरत बोटेको दुःखद मृत्यु भएको थियो। सो घटनालगत्तै निकुञ्जले ध्रुवे हात्तीलाई नियन्त्रणमा लिन विशेष टोली खटाएर खोजी र निगरानी तीव्र पारेको थियो।

 

लगातारको प्रतिकूल मौसम, झरी र निकुञ्जभित्रको घना झाडीका कारण हात्तीलाई फेला पारेर नियन्त्रणमा लिन प्राविधिक टोलीलाई लामो समय लागेको थियो। निकुञ्ज प्रशासनले हात्ती वनमै खुला रहेकाले स्थानीय बासिन्दालाई सदैव सचेत रहन, निकुञ्जद्वारा जारी सुरक्षा सूचनाको पूर्ण पालना गर्न र जंगल आसपास कतै पनि जंगली हात्ती देखिएमा तत्कालै सम्बन्धित निकायमा खबर गर्न विशेष आग्रह गरेको छ।