पञ्चकन्या सामुदायिक वनमा लोपोन्मुख प्रजातिको वृक्षारोपण, वन संरक्षण अभियानलाई थप बल

---

 

रत्ननगर, चितवन। रत्ननगर–११ स्थित पञ्चकन्या सामुदायिक वन उपभोक्ता समूहले वन संरक्षण, जैविक विविधताको प्रवर्द्धन तथा लोपोन्मुख वनस्पतिको संरक्षण गर्ने उद्देश्यसहित वृक्षारोपण कार्यक्रम सम्पन्न गरेको छ।

वन क्षेत्रको पार्किङ नजिकै रहेको खण्ड नं. २ मा पलाँस, मौवा र सिसौलगायत विभिन्न प्रजातिका बिरुवा रोपिएको हो। वनका अध्यक्ष गोविन्द सिद्धान्तका अनुसार संघीय जलाधार व्यवस्थापन स्रोत केन्द्र, गण्डकी जलाधार जलवायु उत्थानशील आयोजना तथा डिभिजन वन कार्यालय, भरतपुरको आर्थिक सहयोगमा कार्यक्रम सञ्चालन गरिएको हो।

कार्यक्रमको उद्घाटन डिभिजन वन कार्यालय चितवनका प्रमुख विष्णुप्रसाद आचार्यले गरेका थिए। उनले वनको दिगो व्यवस्थापन, जैविक विविधताको संरक्षण तथा लोपोन्मुख प्रजातिको जगेर्नामा सामुदायिक वनको भूमिका महत्वपूर्ण रहेको बताए।

संघीय जलाधार व्यवस्थापन स्रोत केन्द्रका जलाधार व्यवस्थापन अधिकृत निकेश कट्टेलले सामुदायिक वनमार्फत नियमित वृक्षारोपण अभियान सञ्चालन गर्नुपर्नेमा जोड दिए। कार्यक्रममा सामुदायिक वन उपभोक्ता महासंघ चितवनका उपाध्यक्ष कृष्ण बगाले, रत्ननगर खानेपानी तथा सरसफाइ उपभोक्ता संस्थाका अध्यक्ष दीपक पौडेललगायतले शुभकामना मन्तव्य व्यक्त गरेका थिए।

वन सचिव तीर्थकुमार विकले सञ्चालन गरेको कार्यक्रममा कोषाध्यक्ष पार्वतीदेवी मगरले स्वागत मन्तव्य राखेकी थिइन्। आयोजकका अनुसार यस अभियानले वन संरक्षणसँगै वातावरणीय सन्तुलन कायम राख्न र भावी पुस्ताका लागि हरियाली संरक्षणमा महत्वपूर्ण योगदान पुर्‍याउने विश्वास गरिएको छ।