रत्ननगरको झुवानीमा सात दिने साइपाटा सजावट तथा सगुन व्यवस्थापन तालिम सकियो 

---

 

चितवन, असार ११ – उद्योग तथा वाणिज्य कार्यालय चितवनको आयोजनामा रत्ननगर नगरपालिका–५, झुवानीमा सञ्चालन गरिएको सात दिने साइपाटा सजावट तथा सगुन व्यवस्थापन तालिम सम्पन्न भएको छ। महिला दिदीबहिनीहरूको सीप विकास तथा स्वरोजगार प्रवर्द्धन गर्ने उद्देश्यले आयोजना गरिएको तालिममा १९ जनाको सहभागिता रहेको थियो।

 

विहीबार आयोजित समापन समारोहका प्रमुख अतिथि वडा नं. ५ का वडाध्यक्ष बालकृष्ण चापागाईंले तालिमबाट प्राप्त ज्ञान र सीपलाई व्यवहारमा उतार्दै आयआर्जनसँग जोड्न सहभागीहरूलाई आग्रह गर्नुभएको छ । उहाँले सीपमूलक तालिमले घरघरबाट उद्यमी उत्पादन गर्न महत्वपूर्ण भूमिका खेल्ने विश्वास व्यक्त गर्दै आगामी आर्थिक वर्षमा पनि यस्ता कार्यक्रमलाई निरन्तरता दिइने बताउए।

 

कार्यक्रममा बोल्दै उद्योग तथा वाणिज्य कार्यालय चितवनका प्रमुख विनोद पौडेलले कार्यालयले तालिमको गुणस्तर अभिवृद्धिका लागि सम्भव भएसम्म तालिम आफैं सञ्चालन गर्ने नीति अवलम्बन गरेको जानकारी दिनुभयो। अन्य संस्थामार्फत सञ्चालन गरिएका तालिम अपेक्षाअनुसार प्रभावकारी नहुने भएकाले अनावश्यक खर्च कटौती गर्दै गुणस्तरीय तालिम प्रदान गर्ने लक्ष्य रहेको उहाँको भनाइ थियो। उहाँले आधारभूत तालिमपछि व्यवसायिक रूपमा अघि बढ्ने सहभागीहरूका लागि मात्र (एडभान्स) तालिम सञ्चालन गरिने समेत स्पष्ट पार्नुभयो।

 

वडा सदस्य निलु शर्मा खतिवडाले वडाका महिला दिदीबहिनीहरूको सीप विकास र आर्थिक सशक्तीकरणमा सहयोग पुर्‍याउने उद्देश्यले तालिम आयोजना गरिएको बताउनुभयो। घरायसी कामबाट बाँकी रहेको समयलाई सदुपयोग गरी आयआर्जन गर्न सकिने वातावरण सिर्जना हुने विश्वास उहाँले व्यक्त गर्नुभयो।

 

कार्यक्रममा उद्योग तथा वाणिज्य कार्यालय चितवनका लेखा अधिकृत रेश्म रेग्मी, कार्यालय अधिकृत कृष्णकुमारी श्रेष्ठ तथा उद्यम विकास सहजकर्ता अम्बिका रिजाल लगायतको उपस्थिति रहेको थियो।

 

तालिममा सहभागीहरुको तर्फबाट  सुशिला अर्यालले आगामी दिनमा पनि यस्ता थप तालिमको व्यवस्था गरिदिन आग्रह गर्नुभयो भने सीता खतिवडाले तालिमले फुर्सदको समयलाई उत्पादनशील बनाउँदै आयआर्जन र व्यवसायिक बन्न प्रेरणा दिएको बताईन।

 

तालिमकी प्रशिक्षक विधा श्रेष्ठले प्रशिक्षार्थीहरूले उत्पादन गरेका सामग्रीको बजारीकरणमा आवश्यक सहजीकरण र सहयोग गर्ने प्रतिबद्धता व्यक्त गर्नुभयो।

 

समापन समारोहमा सहभागी सबै १९ जना प्रशिक्षार्थीलाई प्रमाणपत्र वितरण गरिएको थियो।उक्त तालिमले स्थानीय महिलाहरूको सीप, आत्मनिर्भरता र उद्यमशीलता विकासमा महत्वपूर्ण टेवा पुर्‍याउने उद्योग तथा वाणिज्य कार्यालय चितवनले जनाएको छ ।