देशको गहना सावित्रा ‘साम्बा’को उपचारमा भायानेटको साथ, ५ लाख सहयोग गर्ने घोषणा

---

काठमाडौँ, फागुन — नेपाली महिला फुटबल टोलीकी स्टार खेलाडी Sabitra Bhandari ‘साम्बा’ घुँडाको गम्भीर चोटका कारण कठिन समयबाट गुज्रिरहेकी छन्। मैदानमा देशको नाम उँचो राख्दै आएकी उनी अहिले उपचार र पुनर्स्थापनाको चरणमा छिन्।

यस अवस्थामा इन्टरनेट सेवा प्रदायक Vianet Communications ले आफ्नी ब्रान्ड एम्बेसडर साम्बाको उपचारका लागि ५ लाख रुपैयाँ सहयोग गर्ने प्रतिबद्धता जनाएको छ। कम्पनीका अनुसार साम्बाको शल्यक्रिया तथा त्यसपछिको करिब आठ महिना लामो पुनर्स्थापना (रिह्याब) प्रक्रियामा सहयोग पुर्‍याउने उद्देश्यले उक्त सहयोग घोषणा गरिएको हो।

“थाकेको हो, हारेको छैन” भन्ने साम्बाको आत्मविश्वास र संघर्षलाई सम्मान गर्दै कम्पनीले उनलाई पुनः मैदानमा फर्काउन साथ दिने जनाएको छ।

भायानेटले जारी गरेको सन्देशमा भनिएको छ, साम्बाको रिकभरीको प्रत्येक यात्रामा कम्पनी साथमा रहनेछ र उनी चाँडै पूर्ण स्वास्थ्यका साथ मैदान फर्केर देशलाई फेरि गौरवान्वित बनाउने विश्वास व्यक्त गरिएको छ।

नेपाली फुटबलमा महत्वपूर्ण योगदान दिँदै आएकी साम्बा अहिले उपचारमा केन्द्रित छिन्। खेलप्रेमी तथा शुभेच्छुकहरूले पनि उनको शीघ्र स्वास्थ्य लाभको कामना गरिरहेका छन्।