लन्डन डर्बीमा आर्सनलको पुनरागमन जित : चेल्सी २-१ ले पराजित

---

लन्डन – नयाँ स्ट्राइकर नभए पनि साबिक विजेता आर्सनलको लयमा कुनै कमी आएको छैन। २२ वर्षपछिको प्रिमियर लिग उपाधि जितेको गत सिजनको अन्त्यजस्तै टोलीले यो सिजनको सुरुवात पनि उस्तै प्रभावशाली ढंगले गरेको छ।

कोभेन्ट्री सिटी र एस्टन भिल्लामाथि सहज जित हात पारेको आर्सनलले आइतबार भएको रोमाञ्चक लन्डन डर्बीमा भारी रकम खर्चिएको चेल्सीलाई २-१ ले पराजित गर्‍यो। सुरुवाती अग्रता गुमाए पनि आर्सनलले उत्कृष्ट पुनरागमन गर्दै जित दर्ता गरेको हो।

टोलीको जितमा पुराना अनि परिचित खेलाडीकै भूमिका मुख्य रह्यो। सन् २०२३ देखि आर्सनलमा रहेका काई हाभर्ट्ज र २०२१ मा टोलीमा आबद्ध भएका कप्तान मार्टिन ओडेगार्डले गोल गर्दै टोलीलाई महत्त्वपूर्ण तीन अंक दिलाए। गत सिजनयता करिब ३५ करोड पाउन्ड खर्च गरिसकेको चेल्सीविरुद्ध आर्सनलले सिजनको पहिलो ठूलो परीक्षा सफलतापूर्वक पार गरेको छ।

तीन खेलबाट शतप्रतिशत ९ अंक बटुलेको आर्सनलले हालसम्म मात्र एक गोल व्यहोरेको छ। टोलीका मुख्य खेलाडीहरूले नै हरेक खेलमा निर्णायक प्रदर्शन गरिरहेका छन्।

आर्सनलको यो प्रदर्शनबारे टिप्पणी गर्दै पूर्व प्रिमियर लिग विजेता क्रिस सटनले बीबीसी स्पोर्ट्ससँग भने, “अहिलेको अवस्थामा आर्सनलको यात्रा रोक्न सक्ने कुनै टोली म देख्दिनँ।”