३० असार २०८३, मंगलवार ०६:५६
काठमाडौँ – फिफा विश्वकप २०२६ को पहिलो सेमिफाइनलमा मंगलबार दुई युरोपेली महारथी फ्रान्स र स्पेनबीच रोमाञ्चक भिडन्त हुँदैछ। विश्व फुटबलकै प्रतिष्ठित र पुरानो प्रतिद्वन्द्वी यी दुई टोलीबीचको खेललाई यस विश्वकपको सबैभन्दा प्रतिक्षित खेलका रूपमा हेरिएको छ।
टेक्ससको अर्लिङटनस्थित ७० हजार ६४९ दर्शक क्षमताको ड्यालस स्टेडियममा हुने यस खेलमा विश्व फुटबलका दुई युवा स्टार किलियन एम्बाप्पे र लामिन यामाल आमनेसामने हुनेछन्। स्पेनिस ला लिगाको ‘एल क्लासिको’ मा रियल मड्रिड र बार्सिलोनाबाट खेल्दै आएका यी दुई खेलाडी यस पटक भने विश्वकप फाइनलमा भिड्न लागेका हुन्।
‘अप्टा’ को सुपर कम्प्युटरले गरेको प्रक्षेपणअनुसार निर्धारित ९० मिनेटको खेलमा फ्रान्सको जित्ने सम्भावना ४२.१ प्रतिशत छ भने स्पेनको जित्ने सम्भावना ३१.८ प्रतिशत मात्र छ। खेल अतिरिक्त समयमा जाने सम्भावना २६.१ प्रतिशत अनुमान गरिएको छ।
तथ्याङ्क हेर्दा स्पेन फ्रान्समाथि केही हाबी देखिन्छ। यी दुई टोलीबीच हालसम्म भएका ३८ भेटमा स्पेनले १८ खेल जितेको छ भने फ्रान्स १३ खेलमा विजयी भएको छ। बाँकी ७ खेल बराबरीमा सकिएका छन्। उनीहरूबीचको पछिल्लो भेट एक वर्षअघि सन् २०२५ को युइएफए नेसन्स लिगको सेमिफाइनलमा भएको थियो, जहाँ यामालको दुई गोलको मद्दतले स्पेन ५–४ ले विजयी भएको थियो। त्यसअघि युरो २०२४ को सेमिफाइनलमा पनि स्पेनले फ्रान्सलाई २–१ ले हराएको थियो।
विश्वकपको इतिहासमा भने यी दुई टोली सन् २००६ मा मात्र एक पटक आमनेसामने भएका थिए। जहाँ जिनेदिन जिदानको कप्तानीमा रहेको फ्रान्सले स्पेनलाई ३–१ ले पराजित गरेको थियो।
फ्रान्स र स्पेनको खेल मंगलबार मध्यरातमा हुँदैछ ।
प्रतिकृया दिनुहोस्