राजन र सन्तोषीलाई कान्तिपुर हाफ म्याराथनको उपाधि

---

काठमाडौँ : त्रिभुवन आर्मी क्लबका राजन रोकाया र धादिङकी सन्तोषी श्रेष्ठले कान्तिपुर हाफ म्याराथनको उपाधि जितेका छन्।

कान्तिपुर मिडिया ग्रुप (केएमजी) को आयोजनामा आज यहाँ भएको २१.१ किलोमिटरको हाफ म्याराथनअन्तर्गत पुरुषतर्फ रोकाया र महिलातर्फ श्रेष्ठले उपाधि जितेका हुन्।

राजनले एक घण्टा ४.०३ मिनेटमा उक्त दूरी पूरा गरे। पुरुषतर्फ शीर्ष तीनमा आर्मीका खेलाडीको एकलौटी वर्चस्व रह्यो।

अर्जुन बुढाले उक्त दूरी एक घण्टा ६.०४ मिनेटमा पार गरी दोस्रो र सुशील शाही एक घण्टा ६.५ मिनेटमा पार गरी तेस्रो भए।

काठमाडौँका तीर्थ पुन एक घण्टा ७.४२ मिनेटका साथ चौथो, आर्मीकै सञ्जय श्रेष्ठ एक घण्टा ८.०२ मिनेटका साथ पाँचौँ र आर्मीकै नरेन्द्र राउत एक घण्टा ९.०३ मिनेटका साथ छैटौँ भए।

महिलातर्फ सन्तोषीले एक घण्टा १८.११ मिनेटमा पूरा गरेर विजेता बनेकी हुन्।

आर्मीकी निशा पाल एक घण्टा १८.२६ मिनेटका साथ दोस्रो र आर्मीकै पूर्णलक्ष्मी न्यौपाने एक घण्टा २३.१३ सेकेन्डका साथ तेस्रो भए।

आर्मीकी निर्मला केसी एक घण्टा २५.५४ मिनेटका साथ चौथो, एपिएफकी फूलमती राना एक घण्टा २८.४३ मिनेटका साथ पाँचौँ र सोनसरी रोकाया एक घण्टा ३२.०३ सेकेन्डका साथ छैटौँ भए।

हाफ म्याराथन पुरुष र महिला तर्फका विजेतालाई रु. एक लाख ५० हजार र ट्रफी प्रदान गरिएको थियो।

हाफ म्याराथनतर्फ दोस्रोदेखि छैटौँ हुनेले क्रमशः रु ७५ हजार, रु ५० हजार, रु ३० हजार, रु २० हजार र रु १० हजार प्राप्त गरे।