४ बैशाख २०८३, शुक्रबार ०६:३६
मुम्बई– ओपनर प्रभसिमरन सिंह र कप्तान श्रेयस ऐरको उत्कृष्ट ब्याटिङको मद्दतले पञ्जाब किंग्सले इन्डियन प्रिमियर लिग (आईपीएल) मा बिहीबार मुम्बई इन्डियन्समाथि ७ विकेटको सानदार जित हात पारेको छ । मुम्बईले प्रस्तुत गरेको १ सय ९६ रनको लक्ष्य पञ्जाबले २१ बल बाँकी छँदै मात्र ३ विकेट गुमाएर पूरा गरेको हो ।
पञ्जाबको जितमा प्रभसिमरनले ३९ बलमा ११ चौका र २ छक्कासहित अविजित ८० रनको योगदान दिए । उनलाई दोस्रो इनिङ्समा कप्तान श्रेयस ऐरले साथ दिएका थिए । ऐरले ३५ बलमा ५ चौका र ४ छक्का प्रहार गर्दै ६६ रन बनाए । उनी १५ औँ ओभरमा शार्दूल ठाकुरको बलमा आउट हुनुअघि लगातार तेस्रो खेलमा अर्धशतक पूरा गर्न सफल भए ।
सुरुआती ब्याटर प्रियान्श आर्य (१५) र कूपर कोनोली (१७) सस्तैमा आउट भएपछि पञ्जाब ४५–२ को स्थितिमा पुगेको थियो । मुम्बईका अफगानी बलर एएम गजनफरले दुवै विकेट लिए पनि त्यसपछिको साझेदारी तोड्न मुम्बईका बलरहरू असफल रहे । यो जितसँगै ५ खेलमा अपराजित रहेको पञ्जाब अंक तालिकाको शीर्ष स्थानमा उक्लिएको छ । समान खेलमा मात्र एक जित निकालेको मुम्बई नवौँ स्थानमा छ ।यसअघि टस हारेर ब्याटिङको निम्तो पाएको मुम्बईले क्विन्टन डी ककको शतकीय इनिङ्सको मद्दतले २० ओभरमा ६ विकेट गुमाएर १ सय ९५ रन बनाएको थियो । यस सिजनको पहिलो खेल खेलिरहेका डी ककले मात्र ६० बलमा ८ चौका र ७ छक्का प्रहार गर्दै अविजित १ सय १२ रन जोडेका हुन्। यससँगै उनी तीन फरक टोलीबाट शतक प्रहार गर्ने तेस्रो खेलाडी बनेका छन् । यसअघि सञ्जु सामसन र केएल राहुलले शतक बनाएका थिए ।मुम्बईका लागि नमन धीरले ३१ बलमा ४४ रन बनाउँदै डी ककसँग तेस्रो विकेटका लागि १ सय २२ रनको साझेदारी गरेका थिए। कप्तान हार्दिक पाण्ड्या १४ रनमा आउट हुँदा सूर्यकुमार यादवले खाता खोल्न सकेनन् । पञ्जाबका अर्शदीप सिंहले कसिलो बलिङ गर्दै २२ रन खर्चेर ३ विकेट लिए । उनी प्लेयर अफ द म्याच बने ।
प्रतिकृया दिनुहोस्