नेपाली फिल्ममा दशैँ भिडन्तका लागि अहिलेबाटै सितयुद्धको ‘वार्मअप’

---

काठमाडौं – मेकरहरूबाटै चौथर्फी आक्रमणमा परेकाले गत वर्षको दशैँमा फिल्म नल्याएका दीपकराज गिरी यो पटक ‘छ माया छपक्कै २’ लिएर आउँदैछन् ।

हुन त दशैँ आउन अझै सात महिना बाँकी छ । तर, के गर्नु ? दशैँको लामो सार्वजनिक बिदाको फाइदा दिन मेकरहरू अहिलदेखि नै कसरतमा होमिइसके ।

हलवालाले दशैँमा तीनभन्दा बढी फिल्म लगाउन नसक्ने बताउँदै आएका छन् । तर, मेकरहरू बिदाकै लोभले त्यही मितिमा आँखा लगाउँछन् ।

अहिले नै दशैँमा प्रदर्शन मिति तोक्ने फिल्मको संख्या आधा दर्जन पुगिसक्यो । ‘१२ गाउँ २’, ‘डबल ट्रिपल’, ‘महाराजधिराज’, ‘बाटुलो जुन’, ‘झिँगेदाउ २’ र ‘आबाट आमा २’ ले यो दशैँलाई प्रदर्शन मिति तय गरेका छन् ।

तीन फिल्म प्रदर्शनमा आउँदा शो संख्या कम दिएको भन्दै मेकरहरूले असन्तुष्टि पोख्दै आएको अवस्थामा यति धेरै एक साथ हलमा लागे के होला ?

पहिला साना ब्यानारका फिल्महरू दशैँ प्रतिस्पर्धाबाट हट्दै आएका थिए । यो पटक ठूला ब्यानर, स्टार कलाकार र स्थापित मेकरहरू नै तम्सिएका छन् । तीन वटा त हिट फिल्मको सिक्वेल नै छन् ।

अनमोल केसी र पल शाह जस्ता स्टार पनि यो बक्स अफिसमा प्रतिस्पर्धामा होमिने देखिन्छ । पलको ‘आबाट आमा’ र अनमोल ‘बाटुलो जुन’मा शीर्ष भूमिकामा छन् ।

अब कसको कन्फिडेण्ट र इगो हाबी हुन्छ त्यो समय आएपछि थाहा भइहाल्छ ।

दीपकमाथि दशैँ कब्जा गरेको आरोप निरन्तर लाग्यो । चौथर्फी आक्रमणकै शिकारबाट आजित भएरै उनले गत दशैँबाट विश्राम लिए ।

तर, तुलाना गर्दा तीन फिल्म भन्दा उनको एकको ग्रस कलेक्सन बढी देखियो । दशैँ कब्जा गर्‍यो भनेर भयो त ?

गत दशैँका सबै फिल्म फ्लप भएपछि त्यसबेला दर्शकले दीपकको टिम नै खोजे । यसले उनको कन्फिडेन्ट बढेको पनि छ ।

यो पटक दशैँमा फिल्म ल्याउने भन्दै दीपकले सार्वजनिक अन्तर्वार्तामा बोलिसके । यहाँ रोचक प्रसंग के छ भने- गत दशैँमा फिल्म ‘१२ गाउँ’सँग दीपकको ‘छक्का पञ्जा ५’ जुधेको थियो ।

यही फिल्मको तर्फबाट नियोजित साइबार आक्रमण भएको दीपकको बुझाइ छ । अहिले दीपकको फिल्म ‘छ माया छपक्कै २’सँग ‘१२ गाउँ’को सिक्वेल जुध्ने भएको छ ।

अहिलेदेखि नै ‘१२ गाउँ’का निर्देशक तथा नायक विराज भट्ट र दीपकबीच छेड्खानी सुरु भइसक्यो ।

दीपकले केही दिन अघिको अन्तर्वार्तामा ‘छ माया छपक्कै २’भन्दा पहिला ‘१२ गाउँ २’ हेर्नु भनेर व्यङ्ग्य गर्न भ्याइसके । उनले भनेका थिए, ‘मेरो फिल्म दशैँमा नै आउँछ । ‘१२ गाउँ’को सिक्वेल पनि दशैँमा आयो भने पहिला त्यो हेर्नु अनि मात्रै मेरो हेर्नु ।’

हाँस्यकलाकार न परे दीपक । व्यङ्ग्य जानु त स्वभाविक भइहाल्यो नि ।

विराज भने दशैँमा बिदाको फाइदा लिन पल्किएकै छन्, त्यही ‘१२ गाउँ’बाट । यो पटक किन छाड्थे ? त्यहीमाथि दशैँमै आएर हिट भएको फिल्मको सिक्वेल हो । समय मिलाउन पनि त्यही उपयुक्त देखिन्छ ।

विराजले पनि दीपकलाई काउन्टर दिन भ्याइसके । उनले भनेका छन्, ‘दशैँ मेरो होइन न अरु मेकरहरूको हो । जो आए पनि हुन्छ ।’

अर्थात्, विराज दीपकको टिमबाट हच्किएका छैनन् । उनी भिड्न तयार छन् । अझ अरू फिल्म थपिए पनि केही फरक पर्दैन जसरी उनी प्रस्तुत भएका छन् ।

नयाँ वर्ष अगावै दशैँको बिदाका लागि यसरी छेड्खानी सुरु भइसक्यो । अझै ४-५ फिल्मका मेकरहरू मैदानमा आउन बाँकी नै छ । त्यसपछि के होला ? खैर, दर्शक भड्कने जोखिम नहोस् !