वर्ष ०८२ : नयाँ निर्देशकको कब्जामा ‘हिट लिस्ट’, स्टारहरूकै फिल्म चौपट

---

काठमाडौं – जेन–जी आन्दोलन र चुनावका कारण यो वर्षको रिलिज क्यालेन्डर भद्रगोल हुँदा अपेक्षित संख्यामा फिल्म प्रदर्शनमा आउन सकेनन् ।

देशको राजनीतिक घटनाक्रमले यो वर्ष स्थापित मेकरहरूले नै फिल्म प्रदर्शनमा ल्याउन सकेनन् । यो वर्ष ५० भन्दा केही बढी फिल्म मात्रै प्रदर्शनमा आए । विगतको तुलनामा यो कम हो ।

फिल्मको व्यापार यो वर्ष दयनीय नै देखिन्छ । बक्स अफिसमा चार फिल्महरू ‘ऊनको स्वीटर’, ‘जेरी अन टप’, ‘परान’ र ‘आबाट आमा’ हिट भए ।

विगतका वर्षमा हिट फिल्म दिने नायकहरूको यो वर्ष फ्लप रहे । हिट लिस्टका रेगुलर मेकहरू यो वर्ष गुमनाम देखिए ।

हिट लिस्टमा नयाँ निर्देशक

यो वर्ष दुई डेब्यू निर्देशकले हिट फिल्म दिए । डेब्यू निर्देशक नवीन चौहानले ‘ऊनको स्वीटर’ र अर्का डेब्यू निर्देशक दीपक आचार्य ‘काकु’ले ‘परान’ हिट फिल्म दिए ।

यो वर्ष सबैभन्दा बढी व्यापार गर्ने फिल्म नै ‘परान’ हो । यस फिल्मले १७ करोड ७७ लाखभन्दा बढी व्यापार गरेको छ ।
यो सर्वाधिक हिट नेपाली फिल्मको सूचीमा चौथो स्थानमा आउँछ ।

नवीन चौहानको ‘ऊनको स्वीटर’ सर्वाधिक व्यापार गर्ने फिल्मको सूचीमा सुरुवाती १५ मा परेको छ । चन्द्र पन्तको दोस्रो निर्देशनमा बनेको ‘आबाट आमा’ले १३ करोडको व्यापार गरेको छ ।

सुयोग गुरुङको निर्देशनमा तेस्रो निर्देशनमा बनेको फिल्म ‘जेरी अन टप’ले १२ करोडभन्दा बढी व्यापार गरेको हो ।

नीर शाहको क्लाइमेक्स, अनमोल र पलका लागि फलदायी

यो वर्षको सबैभन्दा हिट फिल्मको शीर्ष कलाकार नीर शाह हुन् । पाँच दशकको अभिनय करिअरमा सबैभन्दा ठूलो संख्यामा दर्शक हलमा पुगेर हेरेको उनको फिल्म यही हो ।

यो फिल्म हेर्न दर्शक हलमा उर्लिएपछि शाहले भनेका थिए, ‘यो फिल्म मेरो अभिनय करिअरको क्लाइमेक्स हो ।’

युवा पुस्तामा राम्रो फ्यान फलोइङ भएका नायकद्वय पल शाह र अनमोल केसीले यो वर्ष करिअरकै सबैभन्दा हिट फिल्म दिए । अनमोलको करिअको हिट फिल्म ‘जेरी अन टप’ हो । पलको हकमा ‘आबाट आमा’ हो ।

फिल्महरू लगातर फ्लप भएपछि ‘अनमोलको स्टारडम खोक्रो’ भन्ने टिप्पणी हाबी बनेको थियो । सोहीकारण उनले करिअरको दोस्रो इनिङको घोषणा गरेका थिए ।

दोस्रो इनिङको दोस्रो फिल्म हिट बनाएर अनमोलले आफ्नो स्टारडम कायम रहेको पुष्टि गरे ।

पुरानो विवादले पललाई मेकरहरूले लगातर फिल्मबाट निकाल्ने क्रम चलिरहेको बेला ‘आबाट आमा’ गरेका हुन् । अन्य मेकरहरू राजनीतिक घटनाक्रमले दर्शक हलमा आउने वातारण छैन भन्दै डराइरहेको बेला पलको फिल्म हिट भयो ।

पलले यो वर्ष आफू दर्शकले प्रिय नै रहेको भनेर प्रमाणित गरिदिएका छन् । पलले फेरि आफ्नो डिमान्ड फर्काएका छन् ।

बढी फिल्म दिने नायकको सबै फ्लप

यो वर्ष सबैभन्दा बढी फिल्म दिने नायक दयाहाङ राई र सौगात मल्ल हुन् । दयाहाङले सात र सौगातले पाँच फिल्म दिए । तर, यी दुवै नायकको फिल्मको व्यापार दयनीय छ ।

यी स्टारहरूको केही फिल्मको हातल यस्तो छ कि केहीले ५० लाख पनि ग्रस कलेक्सन गर्न सकेका छैनन् ।

दयाहाङको फिल्म ‘मिरमिरे’ले ५० लाखभन्दा कम र ‘महाभोज’को ७० लाखभ भन्दा कम व्यापार भयो । हिट फिल्मको सिक्वेल ‘जारी २’ले पनि दयाहाङको उद्धार गर्न सकेन । यो पनि बक्स अफिसको फ्लप फिल्म हो ।

सौगातका ‘जन्ते बाख्रो’, ‘सिटामोल’ र ‘भाइरल गोर्खे’ ५० लाखभन्दा कम व्यापार गर्ने फिल्म हुन् ।

युवापुस्तामाझ राम्रो फ्यान फलोइङ भएका भनिएका प्रदीप खड्काका यो वर्ष प्रदर्शन भएका दुई फिल्म ‘पिताम्बर’ र ‘एक्लो’ फ्लप भए ।

नवनायक समीर भट्टकाे दोस्रो फिल्म ‘बलिदान’ पनि फ्लप भयो । डेब्यू फिल्मबाटै उनी स्थापित युवा स्टार कलाकारसँग तुलना भएका नायक हुन् । तर, पाँच करोड लगानीमा बनेको उनको फिल्म ‘बलिदान’ले पाँच करोड पनि ग्रस कलेक्सन गर्न सकेन ।

यो वर्ष हिट लिस्टमा परेका रेगुरल स्टार नायक विपिन कार्की मात्रै हुन् । उनी ‘ऊनको स्वीटर’बाट हिट लिस्टमा अटाएका हुन् ।

नायिकालाई हिटको क्रेडिट पाउनै सकस

यो वर्ष हिट फिल्मको जस पाउने एक मात्रै नायिका मिरुना मगर हुन् । ऊनको स्वीटर हिट भएको जस दर्शकले उनलाई दिए । अन्य फिल्मका नायिकाहरू नायककै ओझलमा परेका छन् ।

‘परान’बाट नीर शाहले मात्रै एकल क्रेडिट पाए । फिल्म हिट भए पनि उनको जोडीको भूमिकामा रहेकी पूजा चन्द र फिल्ममा सशक्त भूमिकामा रहेकी अञ्जना बराइलीको चर्चा नै भएन ।

‘जेरी अन टप’ हिट हुँदा अनमोलकै चर्चा भयो । दुई नायिका आँचल शर्मा र जशिता गुरुङको चर्चा नै भएन ।

‘आबाट आमा’को हिटको जस पलले मात्रै पाए । उनको जति चर्चा नायिकाहरूको भएन । अर्थात्, यो वर्ष नायिका केन्द्रीय भूमिकामा रहेका फिल्म हिट भएनन् । जसरी अघिल्लो वर्ष ‘बोक्सीको घर’ हिट भएको थियो ।