सरकारी जागिर लगाई दिने भन्दै १ करोड २० लाख ठगी गर्ने पक्राउ

---

धनगढी : सरकारी जागिर लगाइ दिने र अनुदान उपलब्ध गराइ दिने भन्दै करोडौं ठगी गर्ने एक व्यक्तिलाई कैलाली प्रहरीले पक्राउ गरेको छ।

डोटीको आदर्श गाउँपालिका–२ घर भइ हाल कैलालीको गोदावरी नगरपालिका–६ लालपुरमा बस्दै आएका ३३ वर्षीय तुलाराम कोलीलाई प्रहरीले पक्राउ गरेको हो।

जिल्ला प्रहरी कार्यालयबाट खटेको प्रहरी टोलीले उहाँलाई लालपुरबाटै पक्राउ गरेको सो कार्यालयका प्रवक्ता प्रहरी नायब उपरीक्षक योगेन्द्र तिमिल्सिनाले जानकारी दिए।

उनका अनुसार कोलीविरुद्ध कुल एक करोड २० लाख रुपियाँ बराबरको बिगोसहित १० वटा उजुरी परेको छ।

पक्राउ परेका उनलाई जिल्ला प्रहरी कार्यालयको हिरासतमा राखी ठगी मुद्दामा थप अनुसन्धान भइरहेको छ।