चितवनमा ट्यांकरको ठक्करबाट स्कुटरमा सवार एक महिलाको घटनास्थलमै मृत्यु

---

चितवन–चितवनको रत्ननगर नगरपालिका–९, निपनी चोकमा भएको सवारी दुर्घटनामा एक महिलाको मृत्यु भएको छ। जिल्ला प्रहरी कार्यालय चितवनका अनुसार आज (सोमबार) दिउँसो करिब ३ः२५ बजे खैरहनीबाट भरतपुरतर्फ आउँदै गरेको लु २ ख २८९४ नम्बरको डिजेल बोकेको तेलको ट्याङ्करले भित्री सडकबाट मुख्य सडकमा निस्कँदै गरेको ना ५५ प ८०७७ नम्बरको स्कुटरलाई ठक्कर दिएको हो ।दुर्घटनामा स्कुटरको पछाडि सवार भरतपुर महानगरपालिका–७ बस्ने अन्दाजी ३०–३५ वर्षीया मीना रेग्मीको घटनास्थलमै मृत्यु भएको जिल्ला प्रहरी कार्यालय चितवनका सूचना अधिकारी रविन्द्र खनालले जानकारी दिए । यस्तै सोही ठाउँका स्कुटर चालक चालक ५३ वर्षीय पूर्ण सापकोटा भने सकुशल रहेका छन् ।

दुर्घटनापछि ट्याङ्करले सडक किनारमा रोकिराखेका ना ६५ प ७८८३ र ना ५५ प ८०८३ नम्बरका मोटरसाइकल तथा एउटा साइकललाई समेत ठक्कर दिँदा ती सवारी साधनमा क्षति पुगेको छ ।

ट्याङ्कर चालक राप्ती नगरपालिका–७ बस्ने २४ वर्षीय सुजन तामाङलाई प्रहरीले नियन्त्रणमा लिएको छ । दुर्घटनापछि सो क्षेत्रमा केही समय यातायात अवरुद्ध भए पनि हाल डाइभर्ट गरी सञ्चालनमा ल्याइएको प्रहरीले उनले जानकारी दिए । घटनाको अनुसन्धान भइरहेको प्रहरीले जनाएको छ ।