कालिका । कालिका नगरपालिका–४ स्थित पिपरियामा सीमान्तकृत महिलाहरूको जीविकोपार्जन तथा आर्थिक सशक्तीकरणका लागि सञ्चालन गरिएको मौसमी तथा बेमौसमी तरकारी खेतीसम्बन्धी सातदिने तालिम सम्पन्न भएको छ।
सीमान्तकृत महिलाहरूको जीविकोपार्जन तथा आर्थिक सुधार परियोजनाअन्तर्गत करुणा ट्रष्ट युकेको आर्थिक तथा प्राविधिक सहयोग र कालिका नगरपालिकाको समन्वयमा नेपाल दलित महिला उत्थान संघ (एड्वान)ले सञ्चालन गरेको उक्त तालिम बुधबार सम्पन्न भएको हो।
तालिम समापन कार्यक्रममा कालिका नगरपालिकाकी कार्यवाहक नगरप्रमुख एवं उपप्रमुख बिमला तामाङ प्रमुख अतिथिका रूपमा सहभागी हुनुभएको थियो। कार्यक्रममा कालिका नगरपालिका–४ का वडाध्यक्ष मकरमान श्रेष्ठ र वडा सदस्य बाबुराम शर्मा विशिष्ट अतिथिका रूपमा सहभागी हुनुहुन्थ्यो।
सात दिनसम्म सञ्चालन भएको तालिममा सहभागी महिलाहरूलाई मौसमी तथा बेमौसमी तरकारी खेती गर्ने तरिका, बीउबिजन छनोट, बिरुवा उत्पादन, खेती व्यवस्थापन, रोग तथा कीरा नियन्त्रण र उत्पादन वृद्धि गर्ने उपायबारे सैद्धान्तिक तथा व्यावहारिक ज्ञान प्रदान गरिएको थियो।
तालिममा प्रशिक्षक शिवराज पौडेलले प्रशिक्षण दिनुभएको थियो भने एड्वानकी सामाजिक परिचालिका कमला पन्थीले सहजीकरण गर्नुभएको थियो।
कार्यक्रममा बोल्दै सहभागी वक्ताहरूले सीमान्तकृत महिलाहरूको आर्थिक अवस्था सुधार गर्न सीपमूलक तथा आयआर्जनसँग जोडिएका कार्यक्रम आवश्यक रहेको बताएका थिए। तालिममा सिकेका ज्ञान र सीपलाई व्यवहारमा उतार्दै व्यावसायिक तरकारी खेतीमा लाग्न उनीहरूले सहभागी महिलाहरूलाई आग्रह गरेका थिए।
तालिमले महिलाहरूलाई आफ्नै घरआँगन तथा खाली जमिनको सदुपयोग गरी तरकारी उत्पादन गर्न, घरायसी खर्च घटाउन र उत्पादित तरकारी बिक्रीमार्फत आम्दानी बढाउन सहयोग पुग्ने अपेक्षा गरिएको छ।
एड्वानको आयोजनामा सञ्चालित यस कार्यक्रमले सीमान्तकृत महिलाहरूको आर्थिक अवस्था सुधार गर्नुका साथै स्थानीय स्तरमा कृषि उद्यमशीलता, स्वरोजगार र आत्मनिर्भरता प्रवर्द्धनमा योगदान पुर्याउने विश्वास लिइएको छ।
सम्वन्धित समाचारहरु
प्रतिकृया दिनुहोस्