रोशी खोलामा बाढीको जोखिम, पनौती आसपासका स्थानीयलाई सतर्क रहन आग्रह

---

काठमाडौँ – काभ्रेपलाञ्चोक स्थित रोशी खोलामा जलसतहले सतर्कता तह पार गरेको छ। जल तथा मौसम विज्ञान विभाग अन्तर्गतको बाढी पूर्वानुमान महाशाखाका अनुसार पनौती जलमापन केन्द्रमा रोशी खोलाको जलसतह बिहीबार बिहान ५:३० बजे सतर्कता तहभन्दा माथि पुगेको र अझै बढ्दो क्रममा रहेको छ।

खोलामा जलसतह निरन्तर बढिरहेकाले तल्लो तटीय क्षेत्र तथा विगतमा डुबान भइरहने स्थानमा बसोबास गर्ने सर्वसाधारणलाई विशेष सजगता र सतर्कता अपनाउन महाशाखाले आग्रह गरेको छ।

अविरल वर्षाका कारण खोलामा बहाव तीव्र भएकाले बिहानसम्म जोखिमयुक्त क्षेत्रका बासिन्दालाई सुरक्षित स्थानमा रहन र नदी आसपास नजान सुरक्षा निकाय तथा स्थानीय प्रशासनले समेत अपिल गरेका छन्।