कालिका । गडुवा तल्लोभेग खानेपानी तथा सरसफाइ उपभोक्ता समितिको तेस्रो साधारण सभा तथा दोस्रो अधिवेशन शनिबार सम्पन्न भएको छ।
साधारण सभाले समितिको आगामी कार्ययोजना, खानेपानी सेवा विस्तार, थप धारा जडान, सरसफाइ तथा उपभोक्ताको हितमा गर्नुपर्ने विभिन्न कामका विषयमा छलफल गर्दै नयाँ कार्यसमिति समेत चयन गरेको छ।
समितिका अध्यक्ष बलराम श्रेष्ठको अध्यक्षतामा सम्पन्न कार्यक्रममा वडा अध्यक्ष सन्तवीर स्याङदान प्रमुख अतिथि तथा चतुर्मुखी सामुदायिक वनका अध्यक्ष हरिकुमार गुरुङ विशिष्ट अतिथिका रूपमा सहभागी भएका थिए।
कार्यक्रममा नगरपालिका कार्यपालिका सदस्य सरस्वती खत्री वडा सदस्य जीवन लामा ओमकार खड्का पूर्व अध्यक्ष नन्दलाल श्रेष्ठ समितिका उपाध्यक्ष रमेश थिङ, कोषाध्यक्ष सोनम लामा, सचिव टुकमाया सोती, कार्यालय सचिव कल्पना तिवारी तथा लेखा संयोजक रोशन तामाङलगायतको उपस्थिति रहेको थियो। कार्यक्रमको सञ्चालन सचिव टुकमाया सोतीले गरेकी थिइन्।
सभामा कोषाध्यक्ष सोनम लामाले समितिको आम्दानी तथा खर्च विवरण प्रस्तुत गरेका थिए। साथै समितिले हालसम्म गरेका काम, खानेपानीको अवस्था, उपभोक्ताका समस्या तथा आगामी योजनाका विषयमा छलफल गरिएको थियो।
हालसम्म १७५ वटा खानेपानीका धारा जडान भइसकेको र उपभोक्ताको माग तथा आवश्यकताअनुसार थप धारा जडान गर्ने योजना रहेको समितिले जनाएको छ। खानेपानीको पहुँच विस्तारसँगै सेवा थप व्यवस्थित र प्रभावकारी बनाउने विषयमा समेत सभामा छलफल भएको थियो।
कार्यक्रममा लालीगुराँस टोलका अध्यक्ष कृष्णप्रसाद घिमिरे तथा सूर्यपुर खानेपानीका हरिप्रसाद दंगालले खानेपानी व्यवस्थापन र उपभोक्ताका समस्याका विषयमा धारणा राखेका थिए। चतुर्मुखी सामुदायिक वनका अध्यक्ष गुरुङले उपभोक्तामैत्री कार्यक्रम तथा खानेपानी संरक्षणका काममा सहकार्य गर्न आफूहरू तयार रहेको बताए।
साधारण सभाका अवसरमा जग्गादाता छलीमाया श्रेष्ठ तथा बढी पानी महसुल बुझाउने उपभोक्ता गोविन्दप्रसाद घिमिरेलाई सम्मान गरिएको थियो।
कार्यक्रमका प्रमुख अतिथि तथा वडा अध्यक्ष सन्तवीर स्याङदानले खानेपानी नागरिकको आधारभूत आवश्यकता भएकाले यसको दिगो व्यवस्थापनमा सबै पक्ष जिम्मेवार हुनुपर्ने बताए। उनले उपभोक्ताको आवश्यकता र समस्यालाई प्राथमिकतामा राख्दै खानेपानी सेवा विस्तार तथा सुधारका लागि स्थानीय तहबाट आवश्यक सहयोग र सहकार्य गर्ने प्रतिबद्धता व्यक्त गरे।
नयाँ कार्यसमिति चयन अधिवेशनले ज्ञानेन्द्र श्रेष्ठको अध्यक्षतामा नयाँ कार्यसमिति चयन गरेको छ। समितिको उपाध्यक्षमा गजमान मान तामाङ, सचिवमा टुकमाया सोती र कोषाध्यक्षमा सोनम लामा चयन भएका छन्। त्यस्तै सदस्यहरूमा गीता थिङ, सन्चमाया लामा, कुमारी तामाङ, चन्द्रबहादुर स्याङ्बो, काजीमान मगर र दावा दोर्जे लोप्चन चयन भएका छन्। लेखा समिति संयोजकमा रोशन लोप्चन चयन भएका छन्।
नवनिर्वाचित समितिले खानेपानी सेवा विस्तार, थप धारा जडान, नियमित व्यवस्थापन, सरसफाइ तथा उपभोक्ताको हितलाई प्राथमिकतामा राखेर काम गर्ने प्रतिबद्धता जनाएको छ।
सम्वन्धित समाचारहरु
प्रतिकृया दिनुहोस्