१४ श्रावण २०८३, बिहीबार ०७:४७
काठमाडौँ –नेपालको सूचना तथा सञ्चार प्रविधिको क्षेत्रमा अग्रणी इन्टरनेट सेवा प्रदायक कम्पनी वर्ल्डलिङ्क कम्युनिकेसन्सले देशभर ११ लाख घरधुरीमा आफ्नो सेवा विस्तार गरेको घोषणा गर्दै नयाँ ऐतिहासिक उपलब्धि हासिल गरेको छ।
कम्पनीले सामाजिक सञ्जालमार्फत ११ लाख घरधुरीको विश्वास, साथ र निरन्तर सहयोगकै कारण यो सफलता सम्भव भएको उल्लेख गर्दै सम्पूर्ण ग्राहकप्रति हार्दिक आभार व्यक्त गरेको छ।
कम्पनीका अनुसार यो उपलब्धि केवल वर्ल्डलिङ्कको मात्र नभई डिजिटल नेपाल निर्माणमा योगदान पुर्याउने लाखौँ नेपाली सेवाग्राहीको साझा सफलता हो।
सन् १९९५ मा अत्यन्तै सामान्य सुरुवातबाट यात्रा थालेको वर्ल्डलिङ्कले समयसँगै नेपालको इन्टरनेट सेवामा नयाँ–नयाँ प्रविधि भित्र्याउँदै आफूलाई देशकै सबैभन्दा ठूलो इन्टरनेट सेवा प्रदायक कम्पनीका रूपमा स्थापित गरेको छ।
डायल–अप इन्टरनेटबाट सुरु भएको यात्रा आज अत्याधुनिक फाइबर–टु–द–होम (FTTH) सेवासम्म आइपुगेको छ।
पछिल्ला वर्षहरूमा कम्पनीले उच्च गतिको, भरपर्दो र गुणस्तरीय इन्टरनेट सेवा विस्तार गर्दै शहरी क्षेत्र मात्र होइन, दुर्गम जिल्लासम्म आफ्नो पहुँच विस्तार गरेको छ।
वर्ल्डलिङ्कको सफलताको मुख्य आधार ग्राहकको विश्वास र सेवाको निरन्तर सुधारलाई मानिन्छ। अनलाइन शिक्षा, घरबाट हुने कार्यालयका काम, डिजिटल बैंकिङ, स्वास्थ्य सेवा, मनोरञ्जनदेखि सरकारी सेवा उपयोगसम्म इन्टरनेट अपरिहार्य बनेको वर्तमान समयमा कम्पनीले लाखौँ नेपालीलाई डिजिटल रूपमा जोड्न महत्वपूर्ण भूमिका खेलेको छ।
यही कारण धेरै नेपाली परिवारको पहिलो रोजाइका रूपमा वर्ल्डलिङ्क स्थापित भएको देखिन्छ।
कम्पनीले सेवा विस्तारसँगै आफ्नो नेटवर्क, प्राविधिक क्षमता र ग्राहक सेवामा निरन्तर लगानी गर्दै आएको जनाएको छ।
अन्तर्राष्ट्रिय लगानी आकर्षित गर्न सफल भएको वर्ल्डलिङ्कले फाइबर पूर्वाधार विस्तार, नयाँ प्रविधि प्रयोग तथा सेवाको गुणस्तर अभिवृद्धिमा विशेष ध्यान दिँदै आएको छ।
यसले नेपालको डिजिटल पूर्वाधारलाई थप मजबुत बनाउन योगदान पुर्याएको छ।
वर्ल्डलिङ्कले विभिन्न अन्तर्राष्ट्रिय सम्मानसमेत प्राप्त गरेको छ।
विशेषगरी ग्रामीण क्षेत्रसम्म उच्च गतिको इन्टरनेट सेवा विस्तार तथा नेपालको डिजिटल रूपान्तरणमा पुर्याएको योगदानका कारण कम्पनीलाई अन्तर्राष्ट्रिय ‘डिजिटल ट्रान्सफर्मेसन अवार्ड’ समेत प्रदान गरिएको थियो।
११ लाख घरधुरीसम्म सेवा विस्तारको नयाँ कोसेढुङ्गाले वर्ल्डलिङ्कको बजार विस्तार मात्र होइन, नेपाली उपभोक्ताले कम्पनीप्रति राखेको विश्वासलाई पनि प्रतिबिम्बित गरेको छ।
कम्पनीले आगामी दिनमा अझ छिटो, सुरक्षित, भरपर्दो र प्रभावकारी इन्टरनेट सेवा उपलब्ध गराउँदै देशका थप क्षेत्रलाई डिजिटल पहुँचमा जोड्ने प्रतिबद्धता जनाएको छ।
नेपालमा डिजिटल अर्थतन्त्र, सूचना प्रवाह र प्रविधिमैत्री समाज निर्माणतर्फ भइरहेको यात्रामा वर्ल्डलिङ्कको यो उपलब्धिलाई महत्वपूर्ण माइलस्टोनका रूपमा हेरिएको छ।
लाखौँ ग्राहकको विश्वासलाई आधार बनाएर अघि बढिरहेको कम्पनीले आगामी दिनमा पनि गुणस्तरीय सेवा, नवीन प्रविधि र ग्राहक सन्तुष्टिलाई केन्द्रमा राख्दै आफ्नो यात्रालाई अझ सशक्त बनाउने अपेक्षा गरिएको छ।
प्रतिकृया दिनुहोस्