मौसम पूर्वानुमान : पूर्वी र मध्य क्षेत्रमा वर्षाको सम्भावना, पश्चिम तराईमा ‘लु’ को जोखिम

---

काठमाडाैं। नेपालमा हाल मौसमको दोहोरो प्रभाव देखिएको छ, जसका कारण देशका विभिन्न भागमा फरक-फरक मौसमी गतिविधि भइरहेका छन्।

मौसम पूर्वानुमान महाशाखाका अनुसार हाल कोशी, मधेश र बागमती प्रदेशका सम्पूर्ण भूभाग, गण्डकी प्रदेशको अधिकांश हिस्सा र लुम्बिनी प्रदेशको पूर्वी भूभागमा मनसुनी वायुको स्पष्ट प्रभाव रहेको छ।

यसैगरी, देशका बाँकी पश्चिमी भूभागहरूमा भने पश्चिमी वायु र स्थानीय वायुको आंशिक प्रभाव कायम छ। यही वायुको प्रभावका कारण अहिले देशका हिमाली तथा पहाडी क्षेत्रमा साधारणतया बदली रही बागमती, गण्डकी र लुम्बिनी प्रदेशका पहाडी भूभागका एक-दुई स्थानमा मेघगर्जन र चट्याङसहित हल्का वर्षा भइरहेको छ भने तराई क्षेत्रमा आंशिक बादल लागेको छ।

आज दिउँसोको मौसम राष्ट्रिय रूपमा निकै विविधतायुक्त रहने अनुमान गरिएको छ। देशका हिमाली र पहाडी भूभागका साथै कोशी प्रदेशको तराई क्षेत्रमा साधारणतया बादल लाग्नेछ भने मधेश, बागमती र गण्डकी प्रदेशका तराई भूभागमा आंशिक बदली हुनेछ।

मौसमविद्हरूका अनुसार लुम्बिनी र सुदूरपश्चिम प्रदेशको तराई क्षेत्रमा भने आज दिउँसो मौसम मुख्यतया सफा रहनेछ। यसैबीच, देशका हिमाली र पहाडी भूभागका थोरै स्थानहरूमा मेघगर्जन र चट्याङसहित मध्यमसम्मको वर्षा र हिमपातको सम्भावना छ।

तराईतर्फ कोशी प्रदेशका थोरै स्थान तथा मधेश, बागमती र गण्डकी प्रदेशका एक-दुई स्थानमा चट्याङ्गसहित मध्यम वर्षा हुन सक्नेछ। वर्षाको सम्भावना भइरहँदा पश्चिममा भने गर्मीको चर्को प्रकोप देखिनेछ, जहाँ लुम्बिनी र सुदूरपश्चिमका तराई भूभागमा तातो लहर अर्थात् ‘लु’ चल्ने सम्भावना छ भने बागमती र गण्डकीका तराई क्षेत्रमा पनि अत्यधिक गर्मी हुनेछ।

आज रातिको समयमा पनि मौसममा यस्तै मिश्रित गतिविधि सुचारु रहने महाशाखाले जनाएको छ। कोशी, बागमती र गण्डकी प्रदेशका हिमाली तथा पहाडी भूभागका साथै कोशीको तराई क्षेत्रमा साधारणतया बदलीकै स्थिति रहनेछ।

मधेश प्रदेशसहित लुम्बिनी, कर्णाली र सुदूरपश्चिमका हिमाली तथा पहाडी क्षेत्रमा आंशिक बादल लाग्ने भए पनि बागमती, गण्डकी, लुम्बिनी र सुदूरपश्चिमको तराई क्षेत्रमा भने रात्रिकालीन मौसम मुख्यतया सफा रहनेछ।

राति कोशी र गण्डकीका हिमाली तथा पहाडी भूभागका थोरै स्थान र बागमतीका एक-दुई स्थानमा मेघगर्जनसहित मध्यमसम्मको वर्षा र हिमपातको सम्भावना औँल्याइएको छ। यसैगरी, कोशीको तराईका थोरै स्थान तथा मधेश प्रदेशका एक-दुई स्थानमा राति पनि मेघगर्जन र चट्याङ्गसहित मध्यमसम्मको वर्षा हुन सक्ने भएकाले महाशाखाले आवश्यक सतर्कता अपनाउन अनुरोध गरेको छ।