अन्तर्राष्ट्रिय उडानको पर्खाइमा रहेको पोखरा विमानस्थलबाट फ्लाई दुबईले भर्दै दैनिक उडान

---

गण्डकी। लामो समयदेखि नियमित अन्तर्राष्ट्रिय उडानको पर्खाइमा रहेको पोखरा अन्तर्राष्ट्रिय विमानस्थलबाट आगामी सेप्टेम्बर २३ देखि फ्लाई दुबईले पोखरा-दुबई-पोखरा रुटमा दैनिक सिधा उडान सेवा सुरु गर्ने भएको छ।

नेपाल नागरिक उड्डयन प्राधिकरणले फ्लाई दुबईको उडान तालिका सोमबार स्वीकृत गरिसकेको र तोकिएको मितिदेखि दैनिक उडान सुरु हुने जानकारी पोखरा अन्तर्राष्ट्रिय विमानस्थलका महाप्रबन्धक जगन्नाथ निरौलाले दिएका छन्।

उडान अनुमति दिनुअघि फ्लाई दुबईको प्राविधिक टोलीले केही दिनपहिले मात्रै पोखरा विमानस्थलको उच्चस्तरीय सुरक्षा, सेफ्टी तथा सञ्चालन सम्बद्ध पक्षको विस्तृत निरीक्षण समेत गरेको थियो।

सरकारले आगामी आर्थिक वर्ष २०८३/८४ को नीति तथा कार्यक्रममार्फत पोखरामा अन्तर्राष्ट्रिय वायुसेवा प्रदायकहरूलाई आकर्षित गर्न कूटनीतिक पहल गर्ने घोषणा गरेको केही समयभित्रै यो महत्वपूर्ण उपलब्धि हासिल भएको हो।

पोखरा महानगरपालिकाका प्रमुख धनराज आचार्यले फ्लाई दुबईले उडान अनुमति पाएसँगै नेपालको तेस्रो अन्तर्राष्ट्रिय हवाई प्रवेशद्वारका रूपमा रहेको यस विमानस्थलबाट नियमित अन्तर्राष्ट्रिय उडान सञ्चालन गर्ने दिशामा ठूलो प्रगति भएको बताएका छन्।

प्रमुख आचार्यका अनुसार यो केवल एउटा हवाई सेवा थपिने विषय मात्र नभई पोखराको अन्तर्राष्ट्रिय पहिचान, पर्यटन प्रवर्द्धन, आर्थिक गतिविधिको विस्तार र काठमाडौं केन्द्रित हवाई चापलाई विकेन्द्रीकरण गर्ने ऐतिहासिक अवसर समेत हो। दुबईसँग प्रत्यक्ष हवाई सम्पर्क स्थापित भएपछि मध्यपूर्व, युरोप र अफ्रिकालगायत विश्वका ३०० भन्दा बढी सहरसँग पोखरा सिधै जोडिने उनको भनाइ छ।

सन् २०२३ को जनवरी १ मा भव्य रूपमा उद्घाटन भएको यो विमानस्थल झण्डै २२ अर्ब रुपैयाँ ऋण लगानीमा निर्माण भए पनि हालसम्म छिमेकी देशहरूका केही ‘चार्टर’ उडानबाहेक नियमित अन्तर्राष्ट्रिय उडान हुन नसक्दा आन्तरिक उडानमा मात्र सीमित रहँदै आएको थियो।

यसअघि सन् २०२५ को मार्च महिनामा निजी वायुसेवा कम्पनी हिमालय एयरलाइन्सले पहिलोपटक पोखरा-ल्हासा नियमित व्यावसायिक उडान सुरु गरे पनि त्यो लामो समय टिक्न नसकी गत मार्च २३ बाट पूर्ण रूपमा बन्द भएको थियो।

पोखरामा अन्तर्राष्ट्रिय विमानस्थल बनाउने ५० वर्षअघिको योजनाले सार्थकता पाएर पूर्वाधार तयार भए पनि विमानस्थल पूर्ण रूपमा सञ्चालनमा आउन नसक्दा स्थानीय पर्यटन व्यवसायीहरू चिन्तित थिए।

पर्यटकीय राजधानीसमेत रहेको पोखरा अन्तर्राष्ट्रिय हवाई सञ्जालमा जोडिएर ठूलो सङ्ख्यामा विदेशी पर्यटक भित्रने आशमा रहेका यहाँका व्यवसायीहरूले विमानस्थल बनेपछि मात्रै पर्यटन क्षेत्रमा झण्डै एक खर्ब रुपैयाँ बराबरको अतिरिक्त लगानी थपेका छन्।

व्यवसायीहरूले पोखराबाट अन्तर्राष्ट्रिय उडान सहज बनाउन आवश्यक नीतिनियममा सुधार गर्नुपर्ने तथा भारत र चीनका मुख्य सहरहरूमा उडान भर्न राष्ट्रियस्तरका हवाई कम्पनीहरूलाई प्रोत्साहन र अनुमति दिनुपर्ने माग निरन्तर राख्दै आएका छन्।

हाल स्वदेशी वायुसेवा प्रदायक कम्पनीहरूले भने यस विमानस्थलबाट संघीय राजधानी काठमाडौं, भरतपुर र भैरहवालगायतका विभिन्न आन्तरिक गन्तव्यहरूमा नियमित उडान गरिरहेका छन्।