देउवाको पक्राउ पुर्जी प्रकरणमा सर्वोच्चले सरकारलाई छलफलमा बोलायो

---

काठमाडौं– पूर्वप्रधानमन्त्री शेरबहादुर देउवालाई सम्पत्ति शुद्धीकरण विभागको पक्राउ पुर्जीका विषयमा छलफल गर्न आउँदो सोमबारका लागि सरकारलाई छलफलमा डाकेको छ ।

चुनाव अघिदेखि नै विदेशमा रहेका देउवाले वारेसमार्फत पक्राउ पुर्जी रोक्न सर्वोच्च अदालमा रिट निवेदन दर्ता गरेका थिए । उक्त रिट निवेदनमाथि मंगलबार भएको प्रारम्भिक सुनुवाइपछि सर्वोच्चका न्यायाधीश मेघराज पोखरेलको एकल इजलासले सरकारलाई छलफलमा डाकेको हो ।

सर्वोच्चले उक्त मुद्दालाई चाँडो टुंगोमा पुर्‍याउन अग्राधिकार समेत प्रदान गरेको छ । सर्वोच्चले अनुसन्धानमा देउवा परिवारले सहयोग गर्ने प्रतिबद्धता जनाएको, देउवाको उमेर र स्वास्थ्य अवस्था तथा पक्राउ अनुमति जारी गर्ने अदालतको क्षेत्राधिकारमा विचार गर्नुपर्ने विषय रिटमा उठाइएको बताउँदै दुवै पक्षको छलफलबाट टुंगो लाग्ने आदेश गरेको हो । आउँदो सोमबार सरकार र रिट निवेदकबीच छलफल भएपछि अन्तरिम आदेशबारे टुंगो लाग्ने छ ।