विद्या भण्डारीलाई एमालेले दियो पार्टी सदस्यता

---

काठमाडौं- नेकपा एमालेले पूर्वराष्ट्रपति विद्यादेवी भण्डारीलाई पार्टी सदस्यता दिएको छ।

भक्तपुरको गुन्डुस्थित अध्यक्ष केपी शर्मा ओलीको निवासमा बसेको सचिवालय बैठकले २०८२ साउन ५-७ गते बसेको केन्द्रीय समितिको निर्णय उल्ट्याउँदै भण्डारीलाई सदस्यता दिने निर्णय गरेको हो ।

आइतबार मात्रै पार्टी सदस्यता रोक्ने निर्णय गरेिपछि पहिलो पटक पूर्वउपाध्यक्षसमेत रहेकी भण्डारीलाई एमालेले पहिलोपटक प्रमुख अतिथिका रूपमा आफ्नो कार्यक्रममा स्थान दिएको थियो।

३३औँ मदन-आश्रित स्मृति दिवसका अवसरमा एमालेले आइतबार आफ्नो पुरानो कार्यालय रहेको मदननगर बल्खुमा आयोजना गरेको सभामा पूर्वराष्ट्रपति भण्डारीलाई प्रमुख अतिथि बनाइएको थियो।

पूर्वराष्ट्रपति भण्डारीका पतिसमेत रहेका एमालेका तत्कालीन महासचिव मदन भण्डारी र संगठन विभाग प्रमुख जीवराज आश्रित चितवनको दासढुंगामा गाडी दुघर्टनामा परी निधन भएको जेठ ३ गते ३३ वर्ष पुगेको थियो

यो कार्यक्रममा पूर्वराष्ट्रपति भण्डारीलाई प्रमुख अतिथि बनाएर एमालेका उपाध्यक्षहरू रामबहादुर थापा, विष्णु पौडेल र गोकर्ण विष्ट तथा महासचिव शंकर पोखरेल, उपमहासचिव योगेश भट्टराई, सचिवहरू पद्मा अर्याल, भानुभक्त ढकाल, हिक्मत कार्की राजन भट्टराई र खगराज अधिकारीलगायत सहभागी भए।

भण्डारी पहिलोपटक २०७२ कात्तिक ११ मा राष्ट्रपति बनेकी थिइन्। उनी दोस्रो कार्यकालका लागि २०७४ फागुन २९ गते राष्ट्रपतिमा भएकी थिइन् ।

उनले २०७९ फागुन २८ गते राष्ट्रपतिको कार्यकाल सकिएपछि भण्डारीले सक्रिय राजनीतिमा फर्किएको घोषणा गरेकी थिइन् । त्यहीबेला उनले एमालेको सदस्यता नवीकरण गराएकी थिइन्।

तर अध्यक्ष केपी शर्मा ओलीले २०८२ साउन ६ गते भण्डारीको पार्टी सदस्यता रोक्ने निर्णय गराए। त्यसपछि २०८२ मंसिर २७ देखि पुस ३ सम्मको ११औँ महाधिवेशनमा उनले भाग लिन पाइनन् ।

भदौको जेन-जी आन्दोलन र फागुन २१ को प्रतिनिधिसभा निर्वाचनमा ओली नेतृत्वको एमालेको लज्जास्पद हार भएको थियो । अहिले ओलीले नेतृत्व छाड्नुपर्ने दबाब छ । उपाध्यक्ष विष्णु पौडेल र महासचिव शंकर पोखरेल नै ओलीको विपक्षमा हुँदा भण्डारीको सदस्यता नवीकरण भएको हो ।