गण्डकी, बागमती र कोशीमा वर्षा, मधेस र कोशीको तराईमा हुरीको सम्भावना

---

काठमाडौं। हाल देशमा पश्चिमी तथा स्थानीय वायुको दोहोरो प्रभाव रहेका कारण गण्डकी, बागमती र कोशी प्रदेशका केही स्थानमा वर्षा भइरहेको छ।

जल तथा मौसम विज्ञान विभाग, मौसम पूर्वानुमान महाशाखाका अनुसार आज दिउँसो कोशीसहित बागमती, गण्डकी र कर्णाली प्रदेशका हिमाली तथा पहाडी भूभागमा सामान्यदेखि पूर्ण बदली रहनेछ भने देशका बाँकी भागमा आंशिक बदलीको अवस्था रहनेछ।

यसैगरी कोशी, बागमती, गण्डकी र कर्णाली प्रदेशका हिमाली तथा पहाडी क्षेत्रका केही स्थानहरूमा मेघगर्जन र चट्याङसहित मध्यम वर्षाको सम्भावना रहेको छ।

महाशाखाका अनुसार आज मधेस प्रदेशसहित लुम्बिनी र सुदूरपश्चिम प्रदेशका हिमाली तथा पहाडी भूभागका साथै कोशी प्रदेशको तराई क्षेत्रका एक–दुई स्थानमा समेत मेघगर्जन र चट्याङसहित हल्कादेखि मध्यम वर्षा हुनसक्ने अनुमान गरिएको छ।

यसैबीच, मधेस र कोशी प्रदेशका तराई क्षेत्रमा तीव्र गतिमा हुरी चल्ने सम्भावना रहेकाले महाशाखाले स्थानीय बासिन्दालाई सतर्कता अपनाउन विशेष आग्रह गरेको छ। यता सुदूरपश्चिम र लुम्बिनी प्रदेशका केही भूभागमा भने आज तापक्रम बढ्न सक्ने सम्भावना औँल्याइएको छ।

आज रातिको मौसम भने कोशी, बागमती र गण्डकी प्रदेशका हिमाली तथा पहाडी भूभागमा सामान्य बदली रहनेछ। कर्णाली प्रदेशको हिमाली भूभाग र मधेश प्रदेशमा आंशिक बदली रहने भए पनि बाँकी पहाडी तथा तराई भूभागमा मौसम मुख्यतया सफा रहने महाशाखाले जनाएको छ।

रातिको समयमा कोशी प्रदेशका केही स्थान तथा बागमती र गण्डकी प्रदेशका हिमाली एवम् पहाडी भूभागका एक–दुई स्थानमा मेघगर्जन र चट्याङसहित हल्का वर्षाको सम्भावना कायमै रहनेछ। राति पनि तराई क्षेत्रका केही स्थानमा हुरी चल्न सक्ने भएकाले आवश्यक सावधानी र सतर्कता अपनाउन महाशाखाले सम्बद्ध सबैमा अनुरोध गरेको छ।