संसद्‍मा उभिएर हर्कले सोधे : यो देशमा प्रधानमन्त्री छ कि छैन ?

---

काठमाडौं- श्रमसंस्कृति पार्टीका अध्यक्ष हर्कराज राईले वालेन्द्र शाह नेतृत्वको सरकारमाथि निशाना साँधेका छन् ।

प्रतिनिधिसभाको मंगलबार बसेको बैठकमा श्रम, संस्कृति र पार्टीका अध्यक्ष राईले शाह सरकारको कडा आलोचना गरेका छन्।

उनले प्रधानमन्त्री शाह संसद्मा उपस्थित नभएको, सांसदहरूका प्रश्नको जवाफ नदिएको भन्दै सरकार अक्षम र अयोग्य भएको आरोप लगाए ।

सम्बोधनका क्रममा राईले भने,‘यो सरकारको प्रधानमन्त्री छ कि छैन ? छ भने प्रधानमन्त्रीले संसद्लाई सम्बोधन गर्नुपर्छ कि पर्दैन ? सांसदहरूले उठाएका प्रश्नको जवाफ प्रधानमन्त्रीले दिनुपर्छ । यस्तो गर्नु भनेको अयोग्यता र असक्षमताको नमूना हो,’ उनले भने ।

जनता सरकारसँग डराएको आरोप

राईले सरकारले जनतालाई सुरक्षा दिन नसकेको र सीमा क्षेत्र जोगाउन असफल भएको आरोप लगाए । ‘जनता सरकारसँग डराइरहेका छन् । जनताको सुरक्षा नदिने, सीमाक्षेत्र जोगाउन नसक्ने सरकार कसरी सरकार हुन्छ ?’ उनले प्रश्न गरे ।

उनले भारतले सीमामा पर्खाल लगाइरहेको विषयमा सरकार मौन रहेको भन्दै आक्रोश व्यक्त गरे । ‘सीमामा भारतले पर्खाल लगाउँदा सरकार किन मुकदर्शक बनिरहेको छ ?’

मन्दिर, गुम्बा र विद्यालय भत्काउने कार्यको विरोध

राईले सरकारले धार्मिक स्थल र विद्यालय भत्काउने कार्यलाई लिएर पनि सरकारको आलोचना गरे । ‘बोल्न नसक्ने मन्दिर, गुम्बा, गिरिजाघर र विद्यालय भत्काउनुको कारण के हो ? सरकारले जताततै भत्काएको, तोडेको देख्दा जनता त्रसित छन्,’ उनले भने ।

निजी क्षेत्र आतंकित, अर्थतन्त्र ध्वस्त पार्न खोजियो

सरकारको कारण निजी क्षेत्र आतंकित रहेको राईले उल्लेख गरे । भने, ‘निजी क्षेत्र आतंकित छ । देशको अर्थतन्त्र सक्ने तयारीमा हो सरकार ?’

उनले ‘डोजर’ अभियानलाई लिएर पनि सरकारलाई प्रश्न गरे । ‘डोजर आए छाती थाप्ने बाचा गरेकाहरूलाई त्यो पूरा नगरेकामा मुद्दा लाग्छ कि लाग्दैन ?’, उनले रास्वपा सभापति रवि लामिछानेलाई लक्षित गर्दै भने, ‘विदेशी ऋण, डोजर आतंक र प्रहरीको लर्को लगाएर सरकारले कस्तो सन्देश दिन चाहेको हो ?’

राईले व्यंग्यात्मक रूपमा सबै घर भत्काएर देशलाई बालुवाको थुप्रो बनाउन लागिएको बताए । ‘सबै घर भत्काएर बालुवाको थुप्रोमा देश विकासको खाका कोर्न लागेको हो सरकारले ?’, उनले भने ।