एउटा स्मार्ट लाइसेन्स छाप्न १९५.१७ रुपैयाँ लाग्ने

---

काठमाडौं- एउटा स्मार्ट ड्राइभिङ लाइसेन्स कार्ड छाप्न करिब रु १९५.१७ खर्च लाग्ने भएको छ । यही दरअनुसार सरकारले असार मसान्तसम्म १७ लाख स्मार्ट लाइसेन्स छाप्न करिब रु ३३ करोड १८ लाख खर्च गर्ने भएको हो ।

यातायात व्यवस्था विभागसँग भएको सम्झौताअनुसार सुरक्षण मुद्रण केन्द्रले स्मार्ट लाइसेन्स छपाइको दोस्रो चरण सुरु गरिसकेको जनाएको छ । यस चरणमा क्यूआर कोडसहितका आधुनिक लाइसेन्स कार्ड छापिने व्यवस्था गरिएको छ।

हालसम्म दोस्रो चरणअन्तर्गत २२ हजारभन्दा बढी लाइसेन्स छापिसकिएको बताइएको छ । विभागले विशेषगरी दैनिक सेवा तथा अत्यावश्यक आवेदनलाई प्राथमिकतामा राखेर लाइसेन्स वितरण प्रक्रिया अगाडि बढाइरहेको जनाएको छ ।

लामो समयदेखि लाइसेन्स कार्ड छपाइमा देखिएको ढिलाइ घटाउन सरकारले ठूलो संख्यामा स्मार्ट लाइसेन्स छपाइ प्रक्रिया तीव्र बनाएको अधिकारीहरूको भनाइ छ ।