जो ट्रम्पको हत्या योजनासहित लस एन्जलसदेखि वासिङ्टन पुगेका थिए…

---

वासिङ्टन डीसी – अमेरिकी पूर्वराष्ट्रपति डोनाल्ड ट्रम्पको हत्या प्रयास गरेको अभियोगमा क्यालिफोर्नियाका ३१ वर्षीय कोल टोमस एलेनमाथि मुद्दा दायर भएको छ । वासिङ्टनमा आयोजित ‘ह्वाइट हाउस करस्पोन्डेन्ट्स एसोसिएसन’ को रात्रिभोजका क्रममा ट्रम्पलाई लक्षित गरी आक्रमण गर्न खोजेको आरोपमा उनलाई पक्राउ गरिएको हो ।

सोमबार वासिङ्टन डीसीस्थित अदालतमा उपस्थित गराइएका एलेनमाथि राष्ट्रपति हत्याको प्रयाससहित हतियार सम्बन्धी दुईवटा गम्भीर मुद्दा लगाइएको छ । अभियोजनकर्ताका अनुसार शनिबार राति होटलको सुरक्षा घेरा तोडेर भित्र पस्ने क्रममा एलेनसँग एउटा सेमी-अटोमेटिक पेस्तोल, एउटा पम्प-एक्सन सटगन र तीनवटा चक्कु बरामद गरिएको थियो ।

घटनाका क्रममा सुरक्षामा खटिएका ‘सेक्रेट सर्भिस’ का एक एजेन्टलाई गोली लागेको छ । बुलेटप्रुफ ज्याकेटका कारण ती एजेन्टको ज्यान जोगिएको र हाल उनी उपचारपछि अस्पतालबाट डिस्चार्ज भइसकेको अधिकारीले जनाएका छन् । कार्यवाहक महान्यायाधिवक्ता टोड ब्लान्चका अनुसार ती एजेन्टले एलेनलाई रोक्न पाँच राउण्ड गोली चलाएका थिए, जसमा एलेनलाई गोली नलागे पनि उनी भुइँमा लडेपछि तत्काल नियन्त्रणमा लिइएको थियो ।अदालतमा नीलो रङको जम्पसुटमा उपस्थित भएका अभियुक्त एलेन निकै शान्त देखिएका थिए । स्नातकोत्तर तहसम्मको अध्ययन गरेका उनले न्यायाधीशका प्रश्नहरूको “हो, श्रीमान्” वा “होइन, श्रीमान्” भन्दै संक्षिप्त जवाफ दिएका थिए ।

अनुसन्धानका क्रममा एलेन ट्रम्पको हत्या गर्ने योजनासहित लामो यात्रा तय गरेर वासिङ्टन आइपुगेको खुलेको छ । उनी अप्रिल २१ मा लस एन्जलसबाट रेल चढेर सिकागो पुगेका थिए र त्यहाँबाट अप्रिल २४ मा वासिङ्टन आएर सोही होटलमा बसेका थिए जहाँ रात्रिभोज आयोजना गरिएको थियो ।

घटनाका बेला होटलको हलमा ट्रम्प, उपराष्ट्रपति जेडी भान्स र अन्य उच्च पदस्थ सरकारी अधिकारी उपस्थित थिए । गोली चलेलगत्तै सुरक्षाकर्मीले उनीहरूलाई सुरक्षित स्थानतर्फ लगेका थिए । यदि हत्या प्रयासको अभियोग प्रमाणित भएमा एलेनलाई जन्मकैदसम्मको सजाय हुन सक्छ । उनलाई बिहीबार पुनः अदालतमा उपस्थित गराइनेछ । यस घटनापछि ह्वाइट हाउसको सुरक्षा व्यवस्थाबारे पुनरावलोकन सुरु गरिएको छ । बिबिसीबाट