१० बैशाख २०८३, बिहीबार १६:३८
काठमाडौं- नेपाली कांग्रेसले संसदीय दलको नेता शुक्रबार चयन गर्ने भएको छ । बिहीबार दिउँसो सिंहदरबारस्थित दलको कार्यालयमा सांसदहरुले सोबारे छलफल गरेका थिए । छलफलबाट भोलि सम्भव भएसम्म सर्वसम्मत र त्यसो हुन नसके निर्वाचन प्रक्रियाबाटै भएपनि दलको नेता चयन गरिने एक नेताले जानकारी दिए ।
‘दलको नेता चयनका लागि आज हामीले छलफल गर्यौँ । भोलि बिहान ९ बजेतिरबाटै आकाङ्क्षीको नाम दर्ता लगायत प्रकृया हुन्छ । सर्वसम्मत वा निर्वाचन जे हुन्छ, भोलि हुन्छ,’ सांसद भरतबहादुर खड्काले बिहीबार दिउँसो खबरहबलाई जानकारी दिए ।
छलफलमा संसदीय मामिला अध्ययन तथा कानुनी विषयमा संसद समन्वय बोर्ड बनाउने निर्णय समेत गरिएको उनले बताए । ‘संसदीय मामिला अध्ययन तथा कानुनसँग सम्बन्धित रहेर संसद विषय विज्ञसहितको समन्वय बोर्ड गठन गर्नेबारे हामीले कार्यसम्पादन समितिलाई छलफल गरेर सुझाव पनि पठाएका छौँ, उनले भने । यसबारे कार्यसम्पादन समितिको बैठकले टुंगो लगाउनने उनले बताए ।
दलको नेता चयनका लागि कांग्रेसले बिहीबार मतदाता नामावली सार्वजनिक गरेको दलको नेता चयनका लागि गठित निर्वाचन समितिका संयोजक तथा सहमहामन्त्री प्रकाश रसाइली स्नेहीले जानकारी दिए । ‘वैशाख ११ गते बिहान ११ बजेदेखि १२ बजेसम्म उम्मेदवारी दर्ता, ४–५ बजेसम्म मतदान हुने कार्यतालिका रहेको छ,’ उनले भने ।
कार्यतालिका अघि बढाएपनि कांग्रेसले दलको नेता सहमतिमै टुंग्याउनेगरी छलफल गरिरहेको छ । तर सहमति नजुटे भोलि निर्वाचन लगत्तै मतगणना गरेर नजिता घोषणा गर्ने तयारी छ । प्रतिनिधिसभामा कांग्रेसका ३८ सांसद छन् । तीमध्ये दलको नेतामा अर्जुननरसिंह केसी, भीष्मराज आङ्देम्बे, मोहन आचार्यको मुख्य चर्चा छ । प्रमुख प्रतिपक्षी दलका रुपमा कांग्रेसको प्रतिनिधित्व संवैधानिक परिषदमा समेत हुने प्रावधान छ ।
प्रतिकृया दिनुहोस्