काठमाडौं। विवादास्पद व्यवसायीसँगको साँठगाँठ र सम्पत्ति विवरणमा लगानी लुकाएको आरोप खेपिरहेका गृहमन्त्री सुधन गुरुङले आफूमाथि ‘मिडिया ट्रायल’ गरिएको भन्दै कडा आपत्ति जनाएका छन्।
पछिल्लो समय आफूमाथि लगाइएका विभिन्न आरोपहरू र सार्वजनिक भएका समाचारहरूलाई लिएर पहिलोपटक मुख खोल्दै गृहमन्त्री गुरुङले यस्तो प्रतिक्रिया दिएका हुन्। आफूमाथि भइरहेका आलोचनाहरूलाई उनले नियोजित प्रहारको संज्ञा दिएका छन्।
गृहमन्त्री गुरुङले आफूले विभिन्न सेयर बजारमा गरेको लगानी वैध स्रोतबाटै भएको र यसको सम्पूर्ण हिसाब किताब बैंक प्रणालीमा सुरक्षित रहेको दाबी गरेका छन्।
आफूलाई विवादमा तान्नका लागि तथ्यहीन प्रचार गरिएको जिकिर गर्दै उनले आफूले लिएको ऋण लिखित तमसुक र कानुनी प्रक्रियाबाटै लिएको स्पष्ट पारेका छन्। ‘बैंकबाट गएको पैसाको हिसाब हुन्छ, यस्तो स्पष्ट देखिने कारोबारलाई अपारदर्शी भन्नु गलत हो,’ उनले भनेका छन्।
आफूमाथि भइरहेको चौतर्फी आलोचना र पदबाट राजीनामा दिनुपर्ने मागका बीच मन्त्री गुरुङले आफूले सुरु गरेका सुधारका कार्यहरू नरोकिने अडान लिएका छन्।
उनले आफू गृहमन्त्रीका रूपमा रहँदा बिचौलियातन्त्र अन्त्य गर्ने र सुशासन कायम गर्ने आफ्नो मूल एजेन्डामा कुनै सम्झौता नहुने बताएका छन्। ‘मविरुद्ध जतिसुकै मिडिया ट्रायल गरिए पनि, मेरो कार्यकालमा सुरु गरिएका कारबाही र सुधारका कामहरू कुनै हालतमा रोकिने छैनन्,’ गुरुङले दृढता व्यक्त गरेका छन्।
केही दिनअघि मात्रै सार्वजनिक भएको सम्पत्ति विवरणमा उनले विभिन्न कम्पनीमा गरेको लगानी नखुलाएको र विवादास्पद व्यवसायी दीपक भट्टसँग आफ्नो व्यावसायिक सम्बन्ध रहेको भन्दै उनी अहिले ठूलो दबाबमा छन्।
विशेषगरी ‘जेनजी’ आन्दोलनबाट उदाएका नेताका रूपमा परिचित गुरुङले सोही आन्दोलनको मर्मविपरीत काम गरेको भन्दै सामाजिक सञ्जाल र विभिन्न सञ्चार माध्यमबाट आलोचना भइरहेको छ। आफ्नै दल राष्ट्रिय स्वतन्त्र पार्टी भित्र पनि उनीमाथि अनुसन्धान गर्नुपर्ने आवाजहरू उठिरहेका छन्।
यद्यपि, गुरुङले भने आफूले कुनै पनि कानुन नमिचेको र पदको दुरुपयोग नगरेको दोहोर्याउँदै आएका छन्। आफूमाथि उठेका प्रश्नहरूको सामना गर्न तयार रहेको बताउँदै उनले आरोप लगाउनेहरूले तथ्य र प्रमाणको आधारमा बोल्नुपर्ने जिकिर गरेका छन्।
अहिलेको परिस्थितिमा गृहमन्त्री गुरुङको यो स्पष्टीकरणले राजनीतिक वृत्तमा थप बहस निम्त्याएको छ। प्रधानमन्त्री र पार्टी नेतृत्वले यस विषयमा कस्तो कदम चाल्छ भन्ने कुरा अहिले चासोका साथ हेरिएको छ।
सम्वन्धित समाचारहरु
प्रतिकृया दिनुहोस्