८ बैशाख २०८३, मंगलवार ०७:२२
काठमाडौँ – अमेरिकी राष्ट्रपति डोनाल्ड ट्रम्पले इरानसँग नयाँ सम्झौता नभएसम्म उसको बन्दरगाहमा लगाइएको ‘ब्लकेड’ (नाकाबन्दी) नहटाउने स्पष्ट पारेका छन् । युद्ध अन्त्यका लागि पुनः वार्ता हुने वा नहुने भन्ने अन्योल कायमै रहेका बेला ट्रम्पको यस्तो कडा टिप्पणी आएको हो ।
एक हप्ताअघि सुरु भएको अमेरिकी नाकाबन्दीले इरानलाई ‘पूर्ण रूपमा ध्वस्त’ पारिरहेको दाबी ट्रम्पले गरेका छन् । आफ्नो सामाजिक सञ्जाल ‘ट्रूथ सोसल’मा लेख्दै उनले यस द्वन्द्वमा अमेरिका निकै अगाडि रहेको र जितिरहेको उल्लेख गरेका हुन् ।
अमेरिका र इरानबीचको अस्थायी युद्धविराम बुधबार सकिँदैछ । शान्ति वार्ताको दोस्रो चरण पाकिस्तानमा हुने भनिए पनि त्यसबारे अझै अनिश्चितता छ । वार्ताको तयारीका लागि पाकिस्तानको राजधानीमा सुरक्षा व्यवस्था कडा पारिएको छ । तर, अमेरिकी टोलीको नेतृत्व गर्ने भनिएका उपराष्ट्रपति जेडी भान्स अझै वासिङ्टनबाट प्रस्थान गरेका छैनन् । उता इरानले पनि वार्तामा सहभागी हुने वा नहुनेबारे कुनै निर्णय गरिसकेको छैन ।
अमेरिकी सेन्ट्रल कमान्डका अनुसार नाकाबन्दी सुरु भएदेखि हालसम्म २७ वटा जहाजलाई इरानी बन्दरगाहतिरै फिर्ता पठाइएको छ । आइतबार मात्रै अमेरिकाले नाकाबन्दी तोड्न खोज्ने इरानी झण्डावाहक एक मालबाहक जहाजलाई पहिलो पटक नियन्त्रणमा लिएको छ ।
अमेरिकी सेन्ट्रल कमान्डले सार्वजनिक गरेको भिडियोमा अमेरिकी सेनाले उक्त जहाजलाई चेतावनी दिएको र त्यसपछि सैनिक हेलिकप्टरबाट जहाजमा ओर्लिएर नियन्त्रणमा लिएको देखिन्छ । इरानले यस कदमको कडा प्रतिवाद गर्ने चेतावनी दिएको छ, जसका कारण खाडी क्षेत्रमा थप तनाव बढ्ने देखिएको छ ।
प्रतिकृया दिनुहोस्