काठमाडौँ – सरकारले नागढुंगा सुरुङमार्ग खण्ड प्रयोग गर्ने सवारी साधनका लागि ‘सुरुङमार्ग उपभोग दस्तुर’ निर्धारण गरेको छ । भौतिक पूर्वाधार तथा यातायात मन्त्रालयले एक सूचना जारी गर्दै मन्त्रिपरिषद्को गत भदौ २६ गतेको निर्णयअनुसार विभिन्न ४ वर्गका सवारीका लागि फरक–फरक शुल्क तोकेको हो ।
सडक बोर्ड ऐन, २०५८ को दफा ६ को उपदफा (१) ले दिएको अधिकार प्रयोग गरी सुरुङमार्ग प्रयोग गर्ने सवारीबाट दस्तुर लिने निर्णय गरिएको मन्त्रालयका सचिव गोपालप्रसाद सिग्देलद्वारा जारी सूचनामा उल्लेख छ ।
सरकारले तोकेको नयाँ दररेट अनुसार काठमाडौँ प्रवेश गर्दा र काठमाडौँबाट बाहिरिँदा लाग्ने शुल्कमा केही भिन्नता देखिएको छ । कार, भ्यान, पिकअप, ट्रयाक्टर र माइक्रो बस जस्ता हल्का सवारी साधन (वर्ग १) ले काठमाडौँ प्रवेश गर्दा ६५ रुपैयाँ र बाहिरिँदा ६० रुपैयाँ तिर्नुपर्नेछ ।
सबैभन्दा महँगो शुल्क मल्टि एक्सल ट्रक र भारी उपकरणका लागि ६ सय रुपैयाँ तोकिएको छ । सुरुङमार्ग सञ्चालनमा आएपछि यसले नागढुंगाको जाम कम गर्ने र इन्धन बचतमा सहयोग पुग्ने अपेक्षा गरिएको छ । तर, सर्वसाधारण र यातायात व्यवसायीले भने यो अतिरिक्त दस्तुरबारे आपत्ति जनाएका छन् ।
सवारीको किसिम कार, भ्यान, पिकअप, ट्रयाक्टर, माइक्रो बस र अन्य हल्का सवारी प्रेवेश ६५ बाहिरिँदा ६०, मिनी बस, मिनी ट्रिपर/ट्रक ११५/८०, बस, ट्रक (सिङ्गल रियर एक्सल) २६०/२००, मल्टि एक्सल ट्रक, भारी उपकरण र ठूला सवारी साधन ६००/२५० दर तोकिएको छ ।
प्रतिकृया दिनुहोस्