हर्क साम्पाङ श्रमदानका लागि दार्चुला हिँडे

---

काठमाडौँ – श्रम संस्कृति पार्टीका अध्यक्ष एवम् प्रतिनिधिसभा सदस्य हर्कराज राई (हर्क साम्पाङ) श्रमदानमार्फत पुल निर्माण गर्न दार्चुला हिँडेका छन् । सोमबार सामाजिक सञ्जालमा उनले आफू दार्चुलातर्फ लागेको र नागरिकलाई श्रमदानका लागि जुट्न आह्वान गरेका हुन् ।

धरान उपमहानगरपालिकाको पूर्वमेयर हुँदादेखि नै श्रम संस्कृतिको अभियान चलाउँदै आएका राईले राष्ट्रिय राजनीतिमा प्रवेश गरेपछि पनि भौतिक पूर्वाधार निर्माणमा जनसहभागिताको एजेन्डालाई प्राथमिकता दिएका छन् ।

“म त लागें है दार्चुला ! आउनु है श्रमदान गरेर पुल बनाउन,” राईले भनेका छन्, “विदेशी ऋण–सिन लिइँदैन आफू त । म त लागें ।”

सांसद राईले विकास निर्माणका लागि वैदेशिक ऋणमा भर पर्नुभन्दा स्वदेशी पसिना र जनशक्तिको परिचालन गर्नुपर्नेमा जोड दिँदै आएका छन् ।