वर्षमानद्वारा स्वर्णिमको आर्थिक सुधार प्रयासको सराहना

---

काठमाडौं– पूर्वअर्थमन्त्री एवं नेकपा नेता वर्षमान पुनले नवनियुक्त अर्थमन्त्री डा.स्वर्णिम वाग्लेले आर्थिक सुधारका लागि अघि बढाएको कदमको खुलेर सराहना गरेका छन्।

पुनले सामाजिक सञ्जाल फेसबुकमार्फत ‘उच्चस्तरीय आर्थिक क्षेत्र सुधार सुझाव आयोग’ को सिफारिस कार्यान्वयन गर्ने वाग्लेको प्रतिबद्धतालाई प्रशंसा गरेका हुन्।

उनले भने, ‘मैले अर्थमन्त्रीका रुपमा आर्थिक वर्ष ०८१-०८२ को बजेटमार्फत अर्थतन्त्रमा देखिएका दीर्घकालीन चुनौती समाधान गरी नयाँ चरणको आर्थिक सुधारको लक्ष्य हासिल गर्न आयोग गठनको घोषणा गरेको थिएँ।’

विगतमा निवर्तमान अर्थमन्त्री रामेश्वर खनालको नेतृत्वमा गठन भएको उक्त आयोगले लगानी वृद्धि र अर्थतन्त्र सुधारमा बाधक १५ वटा ऐन र राजश्व अनुसन्धान विभाग खारेज गर्ने सुझाव दिएको थियो। नवनियुक्त अर्थमन्त्री वाग्लेले पदभार ग्रहण गर्दै यी सुझाव कार्यान्वयन गर्ने निर्णय गरेका छन्।

पुनले आफू पूर्वअर्थमन्त्री र प्रतिनिधिसभा सदस्यको रुपमा मुलुकको आर्थिक विकासका लागि सत्प्रयासमा सँधै साथ दिने प्रतिबद्धता पनि व्यक्त गरेका छन्।