इराकमा भएको आक्रमणमा सात जना सुरक्षाकर्मीको मृत्यु

---

एजेन्सी– पश्चिमी इराकमा भएको आक्रमणमा सात जना सुरक्षाकर्मीको मृत्यु भएको रक्षा मन्त्रालयले बुधबार जनाएको छ ।

गत फेब्रुअरी – २८ मा इरानविरुद्ध अमेरिका र इजरायली आक्रमणले भड्काएको युद्ध हाल इराकको आधिकांश भागमा फैलिएको छ ।

इरान समर्थक सशस्त्र समूहहरूले अमेरिकी संरचनामा भएका आक्रमणहरूको जिम्मेवारी लिइसकेका छन् ।

रक्षा मन्त्रालयले अनबर प्रान्तको आधारमा भएको आक्रमणमा सात सुरक्षाकर्मीको मृत्यु भएको हुनुका साथै अन्य १३ जना घाइते भएको बताएको छ ।

आक्रमणले आधारको सैन्य स्वास्थ्य क्लिनिकलाई पनि लक्षित गरेको मन्त्रालयले पुष्टि गरेको छ ।

सुरक्षा अधिकारीलाई उदृत गर्दै एएफपीले मृत्यु हुनेहरू मध्ये एक सैन्य डाक्टर पनि रहेको जनाएको छ । यस अघि इराकको आधार शिविरमा मङ्गलबार भएको आक्रमणमा एक कमान्डरसहित १५ जना पिएमएफ लडाकु मारिएका थिए ।

पेन्टागनले वर्तमान द्वन्द्वको समयमा इराकमा इरान समर्थक सशस्त्र समूहहरू विरुद्ध लडाकु हेलिकप्टरहरूले आक्रमण गरेको स्वीकार गरेको छ ।

बगदादले विदेशी सैनिक र कूटनीतिक मिसनहरूलाई लक्षित आक्रमणका साथै पिएमएफका स्थानहरू विरुद्ध आक्रमणको निन्दा गरेको छ ।