६ चैत्र २०८२, शुक्रबार ०६:३४
जेरुसेलम– इरानी ग्यास क्षेत्रलाई लक्षित गरी इजरायलले गरेको पछिल्लो आक्रमणपछि जेरुसेलमको आकाशमा ठूला विस्फोटका आवाज सुनिएका छन् । यसैबीच इजरायली प्रधानमन्त्री बेन्जामिन नेतान्याहुले उक्त सैन्य कारबाहीमा इजरायलले ‘एक्लै कदम चालेको’ बताएका छन् ।
प्रधानमन्त्री नेतान्याहुले यो युद्धलाई इजरायलका लागि मात्र नभई सम्पूर्ण विश्वकै अस्तित्वका लागि खतराका विरुद्धको लडाइँका रूपमा स्थापित गर्न खोजेका छन् । पत्रकार सम्मेलनका क्रममा उनले आफ्नो दृष्टिकोणबाट यो युद्धको मुख्य उद्देश्य के हो भन्ने कुरा स्पष्ट पारेका छन् ।
सम्बोधनको सुरुवातमा नेतान्याहुले हिब्रु भाषामा लामो भाषण दिँदै इजरायली जनताको धैर्य र दृढताको प्रशंसा गरे । उनले आगामी दिनमा पनि जनतामा यस्तै अडिगता आवश्यक रहेको संकेत समेत गरे ।
आफ्नो भाषणको अंग्रेजी अंशमा भने उनले विश्व समुदायलाई लक्षित गर्दै उस्तै सन्देश दिए । यो विषयमा अदूरदर्शी हुनु गल्ती हुने भन्दै उनले सबैलाई संयम र दृढ रहन आग्रह गरे ।
नेतान्याहुले दाबी गरेअनुसार यदि यो सैन्य कदम नचालिएको भए इरानबाट प्रहार गरिने मिसाइलहरूमा आणविक हतियार हुने सम्भावना रहन्थ्यो । अमेरिकी नागरिकहरूलाई सचेत गराउँदै उनले भने, “यसको मारमा तपाईंहरू पनि पर्न सक्नुहुन्छ ।”
उनले यो युद्धलाई इरानद्वारा इजरायलमाथि मात्र नभई विश्वकै अस्तित्वमाथि आइलागेको संकटका रूपमा व्याख्या गरिरहेका छन् । यसका साथै नेतान्याहुले इजरायल र अमेरिकाबीच कुनै पनि विषयमा मतभेद नरहेको सन्देश दिने प्रयत्न गरेका छन्। दुई देशबीच दूरी बढेको भन्ने कुरालाई उनले ‘भ्रामक समाचार’ को संज्ञा दिएका छन् ।
प्रतिकृया दिनुहोस्