४ चैत्र २०८२, बुधबार ०७:०५
काठमाडौँ – फागुन २१ को निर्वाचनबाट प्रतिनिधि सभाको सबैभन्दा ठुलो दल बनेको राष्ट्रिय स्वतन्त्र पार्टी (रास्वपा) ले आफ्ना नवनिर्वाचित सांसदका लागि दुईदिने विशेष प्रशिक्षण दिएको छ । मंगलबार १२ घण्टे प्रशिक्षणमा सहभागी भएका सांसद आज दोस्रो दिन सात घण्टे प्रशिक्षणमा सहभागी हुँदै छन् ।
त्यो प्रशिक्षणमा सहभागी नभएका ‘भावी प्रधानमन्त्री’ का रूपमा हेरिएका वरिष्ठ नेता बालेन्द्र साह (बालेन) भने बहुमतको सरकार कस्तो बनाउने भनेर टिम निर्माणमा व्यस्त छन् ।
नयाँ सरकार गठनको प्रक्रिया सुरु गरेको रास्वपाले बालेन नेतृत्वमा सरकार गठनका लागि आन्तरिक गृहकार्य गरेको हो । बालेन यतिबेला मन्त्रिमण्डलको छनोटबारे छलफलमा व्यस्त भएका हुन् । बालेनलाई प्रधानमन्त्री बनाउन रास्वपाले संसदीय दलको नेता चयन र पार्टी विधानमा संशोधन गर्ने प्रक्रियासमेत आवश्यक पर्ने भएकाले त्यसको समेत तयारी गरिरहेको छ ।रास्वपा सभापति रवि लामिछाने, वरिष्ठ नेता साह, उपसभापतिद्वय डा. स्वर्णिम वाग्ले र डीपी अर्यालबीच भावी सरकारका विषयमा पटकपटक छलफल भएका छन् । शीर्ष नेताको छलफल कस्ता व्यक्तिलाई मन्त्री बनाउने, सरकार बनेलगत्तै के-कस्ता काम सुरु गर्ने लगायतका विषयमा केन्द्रित छन् ।
के भइरहेको छ प्रशिक्षणमा ?
मंगलबारको उद्घाटन समारोहमा प्रमुख मन्तव्य पार्टीका उपसभापति डा. स्वर्णिम वाग्लेले राखेका छन् । वाग्लेसहित अर्का उपसभापति डोलप्रसाद अर्यालले समेत निर्देशन दिएका छन्।
पहिलो दिन पूर्वसचिव सुरेश अधिकारी र तोयानाथ अधिकारीको प्रशिक्षण पाएका रास्वपाका नयाँ सांसदले आइटी विज्ञ डा. दोभान राईका कुरासमेत सुनेका छन् । उनले कृत्रिम बुद्धिमत्ता (एआई) र एल्गोरिदमबारे प्रस्तुति दिएका हुन् ।
यसबाहेक विघटित प्रतिनिधि सभाका सदस्यसमेत रहेका अशोक चौधरी, शिशिर खनाल, तोसिमा कार्की, सोविता गौतम, गणेश पराजुली, हरि ढकाल, मनिष झा, विराजभक्त श्रेष्ठले संसदीय अभ्यासका अनुभवसमेत सुनाएका छन् ।
बुधबारसमेत प्रशिक्षण निरन्तर रहने छ । दोस्रो दिन दिउँसो सभापति लामिछानेले समापन मन्तव्य राखेसँगै रास्वपाको दुईदिने प्रशिक्षण सकिने छ ।
गत फागुन २१ गते सम्पन्न प्रतिनिधि सभा सदस्य निर्वाचनमा रास्वपाले प्रत्यक्ष र समानुपातिकतर्फ गरी १ सय ८२ सिट हासिल गरेको छ ।
प्रतिकृया दिनुहोस्